سكريبت طلاق الاهل (كامل) بقلم حور حمدان
كان عيد ميلاده اليوم اللي قررت أبدأ أنا وأتكلم معاه فيه
بعتله الصورة بحماس وكنت بكتب كلام
بس اتصدمت لما قالي
مين
مين يعني حتى الرقم مش متسجل
لقيت إيديا بتكتب وأنا دموعي بتنزل في صمت ووجع
مين
تاني
تاني
ما هانتش عليك حتى تسجل رقمي عشان تعرف أنا مين
بعتله المسدج وقلبي بيبكي
ورجعت أكتب من تاني
أنا بنتك اللي رميتها واتخليت عنها عشان خاطر ناس ملهاش أي لازمة
بس للأسف كان لازم أقوله الحقيقة
فكتبتله تاني
ها تحب أقولك أكتر ولا كفاية
تصدق كل يوم بندم إنك أبويا
بعت المسدج وقفلت الفون
ونمت
نمت بعد ما هو شاف المسدجات بس مردش
أنا بابا وماما منفصلين من وأنا عندي عشر سنين
اتحرمت من حنان الأم
لأن أمي أول ما انفصلت اتجوزت وسافرت مع جوزها
وبابا عمل الأصعب شوية
بابا اتجوز
وفي يوم طردني من البيت
وروحت عند جدتي لأمي
وعمري ما أنسى اليوم ده
رماني في عز البرد
عشان خاطر مراته
فضلت الليلة دي نايمة تقيلة،
مش نوم راحة،
نوم هروب.
صحيت تاني يوم على صوت الدنيا وهي ماشية عادي،
الناس بتضحك، بتتكلم،
وأنا جوايا طفلة لسه واقفة في عز البرد،
مستنية بابا يفتح الباب ويقول ادخلي.
قعدت مع جدتي،
كانت طيبة بس كِبرها كان تقيل،