رواية وما خفي كان اعظم (كاملة جميع الفصول) بقلم امل صالح
_ عمو اللي تحت ده كان قاعد مع ماما وأنت في الشغل يا بابا..
كان لسة هيدخل معلقة من الأكل قدامه جوة بُقه، المعلقة ثبتت قصاد وشه في الهوا، وهي بَصت لإبنها الصغير اللي لم يتعدى عُمره الخمس سنوات بعيون واسعة بصدمة، في حين ضحك الطفل الصغير ضحكة بريئة تليق بوشه الملائكي وهو بيوزع نظراته بين الإتنين؛ أمه وأبوه..
بصت ناحية زوجها بعد ما اكتفت من النظر لإبنها بصدمة، شافت نظراته الحادة المصوبة ناحيتها، رجعت تبص لإبنها تاني بعصبية وكانت على وشك تتكلم بحزم وضيق وتوبخه على كذبه لكنه سبقها وهو بيسيب المعلقة بهدوء موتر على الطبق قصاده:
_ بجد يا أنس؟؟ كانوا بيعملوا إيه؟!
عيونها ازدادت اتساعًا بعد سؤاله، بصتله بعدم تصديق واتكلمت:
_ أنت بتقول إيه يا إبراهيم؟؟ ده سؤال تسأله للولد؟
بصت لإبنها بحدة وكملت:
_ أنت شوفت عمو هنا امتى يا أنس؟؟ أنا كام مرة قولتلك عيب نكذب ونقول حاجة ماحصـ…
قاطعها بعيون مُحذرة وانفعالات غضبه بدأت تظهر على وشه وهو بيضغط على كل كلمة:
_ سيبي الولد يتكلم يا عِيشَة، هو ده يعرف حاجة عن الكذب ده؟؟ سيبيه عايز أسمعه!
سابت مكانها بانفعال ووقفت عن الكرسي وبصتله بدون ما تنطق كلمة واحدة بعيون لازالت محتفظة بصدمتها، أما أنس الصغير فرجع يضحك تاني، نفس الضحكة البريئة … بدون ما يجاوب!