رواية من نظرة عين الفصل العاشر 10 بقلم هند سعدالدين (الرواية كاملة)

رواية من نظرة عين الفصل العاشر 10 بقلم هند سعدالدين

وصلنا تحت البيت..

نزلت أنا وهو من العربية، وكنا بنرقص ونغني الفلكلور الإسكندراني، الناس كلها طلعت في البلكونات، اللي تزغرط واللي يصفر واللي نزلوا يرقصوا معانا وإحنا منعرفهومش..

وبعد ما هلكنا من الرقص..

ـ يلا نطلع البيت؟

رفعت إيدي، استغرب وماكنش فاهم..

ـ شيلني..

ـ نعم؟

ـ عادات عيلتنا العروسة بتتشال..

ـ الكلام ده كان قبل الرقص والفرهضة..

ربعت إيدي واهلي واهله بدأو ياخدوا بالهم..

ـ قصدك إني تقيلة؟ 

ملس على شعره، بدأ يتوتر..

ـ عديها يا زهرة..

ـ لأ.

شالني واتداريت فيه، لف بيا في الشارع وكان بيضحك، وأهالينا كانوا بيسقفوا لنا.. لحد ما طلعنا شقتنا.

وصلنا قصاد باب الشقة..

ـ نزلني.

مردش، وطلع المفتاح بإيده التانية..

ـ عندي إيدين وإنتي خفيفة يعني..

ـ أومال مين اللي كان بيندب تحت، يا زهرة اصلي متفرهش، يا زهرة طب شكلي..

قاطعني..

ـ دلوقتي جاي على هوايا يا ستي..

ـ طب ما إحنا وصلنا البيت ودخلنا أهو، ومفيش حد معانا..

مهتمش لكلامي..

فضل شايلني لحد باب اوضة النوم..

نور النور..

بدأت اتوتر..

ـ نزلني بقى يا مالك، يوووه..

وصلنا عند السرير🤭

نزلني ببطء..

ميل عليا 

ـ أصل إحنا عوايد عيلتنا العروسة تتشال لحد سريرها..