بقلم:-أسماء أبوشادي Ana Amera Habeby
_______________________________________سبحانك ربي لا إله إلا انت إني كنت من الظالمين
الأمل
لو املي فيك مات أنا هموت
أنا حاسة اني اتوجدت في الدنيا علشان أكون حبيبتك
ما ينفعش أكون غير حبيبتك
ولو ده منصب وانت قررت ترفدني منه
يبقى انت كدة بتعلن نهاية حياتي وبداية مآساتي
سما روحت البيت وعيطت كتير. كتير جدا
طلعت كل اللي جواها على هيئة دموع بتحرق عينيها وبتزيد من ذبولها
وقررت انها هترجع تروح الشركة وتهتم ببنتها وتتجاهله زي ماهو بيتجاهلها.
أما تحت في أوضة نور. كان نايم على السرير
مش مرتاح.
وهيرتاح أزاي وهو بعيد عن سماه.
مشتاقلها
ريحتها وحشته
ريحة شعرها. دفا أنفاسها و نبض قلبها اللي بيسابق نبض قلبه
ولا نعومة بشرتها تحت ملمس ايديه
مشتاق لكل حاجة فيها ولكل حاجة تخصها
هو مشتاق
أصله عاشق والعاشق لازم يشتاق لمعشوقته
مش عارف هو لسه بيحبها ولا لاء
بس لو مابقاش بيحبها.
طب ليه اشتاقلها
وازاي يشتاق.
دي جرحته وآذيته في أقرب الناس له
هو ياما قالها. إلا أبويه
استحمل منها كتير. لأنه بيحبها ومايقدرش على بعدها
لكن غلطها المرة دي كبير.
كبير لدرجة أنه مش قادر يسمعلها.
هي النهاردة قدرت تشوف نظرات الغضب في عينيه
بس ماركزتش
ماهي لو كانت ركزت كانت قدرت تشوف ان ورا الغضب ده في شوق كبير مستخبي.
شوق ممزوج بحزن أكبر
وعتاب اللسان خايف ينطق بكلماته لا يظهر اد ايه هو ضعيف.
ومايعرفش أن الضعف ادام معشوقته مش إهانة له
لا دا كسرة قلب ليها هي