بأعين متسعة وذهول عجيب نظرت “بيسان” تجاه الضابط “مصطفى” ببلاهة تهتف بصدمة …
– إيه ؟!!!! تقصد إيه إنهم إتفقوا معاهم على إنهم يتخلصوا مني !!!!!!
إستطرد “مصطفى” موضحًا لتلك الساذجة المخدوعة …
– زي ما بقولك كدة ، الشخص إللي دلك عليهم ووثقتي فيه إتفق معاهم على إنهم يخلصوا منك ، بس المجرمين دول فكروا قبل ما يخلصوا منك يطلعوا لهم بقرشين من والدك الأول ، عشان كده طلبوا منك تصوري الفيديو وبعتوه لوالدك …
تطلعت “بيسان” بنظرات حائرة بين “بدر” والضابط “مصطفى” تحاول فهم هذا الأمر الذي تخطي المنطق …
– ثواني، يعني إنت قصدك إن إللي وصلني ليهم هو إللي بلغهم إنهم يخلصوا مني !!!!!
– بالظبط كدة …
حركت “بيسان” رأسها بالرفض التام …
– لأ طبعًا فيه حاجة غلط ، الناس دي أنا واثقة فيها جدًا جدًا ، لا يمكن يعملوا كدة …
نظر “مصطفى” تجاه “بدر” يطالبه بمساعدته لحثها على إخبارهم من يكون هذا الوسيط …
– طيب خلينا نتأكد ، قولي لنا مين هو الوسيط ده وإحنا نعرف ، مش كدة ولا إيه يا “بدر” ؟؟