رواية عيون القلب الفصل المائتان وسبعة وستون 267 بقلم ماريا علي الخمسي
رواية عيون القلب البارت المائتان وسبعة وستون
رواية عيون القلب الجزء المائتان وسبعة وستون
رواية عيون القلب الحلقة المائتان وسبعة وستون
دونك جوبه .. لانقاني مرايف و دونك جوبه
وجيتي جوبه … دارك جوبه
ونلقانا زاد الرياف عليك
ونلقانها غيه علي محسوبه
ونلقاني واخذ قرار أنجيك
كيفك موحي
كيفك نعاني في نزيف جروحي
ليش أنت فاقد حب وأنا بروحي
وأحنا بنينا الحب طوبه طوبه
ما عاد ترضي بالجفا يا روحي
ولا عــــاد نا نقبل فراقك توبه
نا في وادي هي جـــــايه ميلين …
دونك جوبه … يا محبوبه
(كلمات الشاعر المبدع علي الكيلاني الله يحفظه)
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
جوبة في اللغة تعني البعيد عنا مسافة، و ربما هي حاليا مش بعيدة هلبة بضعة امتار بينه و بينها بس صعب جدا يوصلها و من اللحظة هذه دق ناقوس. الخطر في قلبه و وجدانه بأن ايام صعبة جدا في انتظاره
اقترب منه عبدالمالك : كنت نكلم في سمر
ايمن ما رد و عيونه ع الباب
في بال الابن الاكبر مية سؤال و سؤال بس شرود ايمن خلوه يحتفظ بيهم لنفسه و قرر يغير الموضوع : خالي حمزة رفض يروح ع قد ما دويت معاه
وجه نظراته ليه و شاف فيه الحيط اللي ح يقعد ديما وراها : في ناس يا ولدي يكونوا في حياتك بس ما تشوفهم ديما بعد وين و وين لكن يوم اللي تطيح او تنضر تلقاهم طول وراك و جنبك كيف السيف
فهم مقصده : ايه و الله، بدري كان يتكلم بالتيلفون نسمع فيه يتخابط مع واحد لان واخذ منه بضاعة ع اساس يوصلها اليوم لطرابلس و وقت سالته قالي بعد كلمني معاوية رديت من الطريق ما نقدر نسيب لبنى
زفر بضيق من النار اللي في صدره .. نار الانتظار اللي ساعاته طالو : ايه لبنى .. ان شاء الله خير يا رب
و لحظات من هالنوع تكون انت في وادي و المحيطين بيك في وادي
تنتظر منهم الدعم بس للاسف يجيك منهم غير الهم و الضغط
في الوقت اللي كان هم سمر مواساة افطيمة و فارس و كيف تقعد قدامهم قوية
فارس اللي رفض حتى يدخل الحوش مقعمز قدام حوش خوه و في ايده بعض الحجر يلعب بيه و عيونه ع باب السور و كل ظنه الطفولي ان امه ساعة لو طال الامر و ح تدخل في سيارة بوه
و في الوادي الثاني … هي الجدة افطيمة .. فرصة و جتها : انت يا بلية
و معروف هويتها من .. اكيد حورية : نعم
: جلم يقطع راسك اللي كيف الطبل .. عدي اتصلي بمرة احميدة و قوليلها تجيب افطيمة و تجي تقعد هنا شني عندها غادي دام البومة خلاص بتموت
رعشت من الكلمة : باهي اهو توا نكلمها
نرمين مش عاجبها ابدا طريقة كلام حنتها لامها بس ما تقدر تعترض
لاحظت افطيمة نظراتها : خير دعوتك تبرقي فيا هكي
جت واقفة : شي يا حنتي
تذكرت مكالمة نبيلة ليها : اسمعي عدي لحوش اسميعين (هكي تنطق اسماعيل) و دقي عليه قوليله تبيك حنتي و بعد يجي نبيه بروحه مش تقعدي انت و امك ترقبي علينا من الباب
من داخلها بتموت من اسلوبها بس ما في مجال للاعتراض
طلعت من جنبها قاصدة حوش خوها
في حين عند سمر … ارتبكت و قعدت بين نارين
هل تنفذ كلام افطيمة و تمشي عندها، او تنفذ كلام رجاء اللي وصتها تقعذ في حوشها
بعد حيرة دامت دقايق ما كان قدامها غير شخص واحد تستشيره
حطت ع رقمها واتصلت : السلام عليكم
، كيف حالك فايزة و كيف حال عمي حمد و السموح بالله شنو اخباره
: الحمدلله يا سيمو في خيار الخير و كلهم هنا يدزولك السلام، انت مغير طمنيني ع عزوزك و الله توا بس كيف حكتها ليا سليمة و راهو في بالي بنرن عليكي و نطمن
سمر : الحمدلله ، انا يا فايزة ما شفتها بس كلمت عبدالمالك و طمني ان شاء الله خير
لاحظت ان صوتها فيه توتر : ان شاء الله يا رب ، مغير احكيلي و نسمع فيك انت فيك حاجة ثانية
تأكدت ان افطيمة مركزة في دراستها .. كملت لعند زواية المطبخ :ماما رجا ديما حريصة ان اسرار الحوش هذا يقعدوا اهني و اصلا قبل ما تمشي طلبت مني نقعد في حوشي انا و تامي و توا حنتهم يعني جدة. عبدالمالك بعثتلي تبينا نمشوا غادي و انا يا فايزة معش عرفت تتصرف
فايزة : اسمعيني كويس انت دام ان رجاء في المستشفى ما تقدري تقولي مش ماشية ع شان هكي تمشي وتقمعزي جنبها و كل حاجة ما نعرفش ما قالوليش ما نعلمش و اول فرصة اهربي و روحي
كانت خايفة و حاسة بوحدة كبيرة في عدم وجود رجاء : ان شاء الله صحيتي فايزة
: اي وقت تحتاجيني رني و ما تخافي من شي خليك كيف ما عرفتك
سمر في سرها انت ما تعرفيها افطيمة : باذن الله
اللحظة اللي انهت فيها المكالمة معاها
كان اسماعيل ابن سليمان يسكر في باب دار حنته زي ما طلبت منه و في داخله مية سؤال و سؤال : كيف حالك يا حنتي
: الحمدلله ، و مازال يولي حالي احسن ان كان سمعت كلامي
قعمز جنبها : و من فينا ما يسمع كلامك
ضربت فمها بايدها : خليني ساكتة هو من اللي يسمع في كلامي اياح نووو
ما عرف ما يرد عليها
حطت ايدها ع كتفه : برق فيا زين زين و قولي اختك ملاك وين
لون وجهه انخطف ما فهم سبب السؤال : وين يا حنتي ماهو عارفة انها في تركيا
فنصت فيه : و ليش ماشية غادي
وجهه تغير و تحشم : وين نعلم بدعوتها هي و وراجلها هبال و قلة عقل
شدت العكوز و ضرباته بيه : هبال مش هبال انا ما دخلني اللي نعرفه ان بنت بنتي ماهي اقل من حد و اذا ما تبي تطلع بيها لبلاد برا طلعها حتى هنا
طارتله : هي دوتلك
شهقت : ما تكون بنت حنونة الغالية لو دوت حرف هذه بنت اصل و رباية عمتك الله يرحمها لا تدوي و لا تشكي .. لكن انا اللي دويت و الله يا اسميعين ان كان ما تظهرها وين ما يظهرن اللي كيفها ما عاد تدوي معايا و لا تخشلي دار و لا تسلم عليا و لا لساني يدوي مع لسانك
و عاد هو عقليته زي بوه و اعمامه كل شي الا رضاها : خلاص يا حنتي ليش حمقتي بس و الله توا نطلعها غير خليها يوم ثاني انا هدا وين روحت و بويا يبيني نمشي معاه لعمي و الاولاد في المستشفى
: اياح انوو.. خليني من المصيبة اللي حصلنا فيها توا .. و دير اللي قلتلك عليها اذا مش اليوم غدوا