رواية عشق الثأر الفصل الخامس 5 بقلم مينة طلال
بارت ٥
⊹ْ₊═ْ⊹𓈓⊹═ْ⊹𓈓⊹ْ═⊹𓈓⊹ْ═₊ْ⊹
أسحاق: عمي!
غايب: ها ابني شعدك بهيج وكت تفتر هنا؟ بيك شي تريد شي..
_ لا عمي بس جنت راجع من الشغل ، صار طريقي من منطقتنا
_ انت مو بالفرع الثاني منطقتكم ، شجابك هنا!
_ منطقتي منطقة ابوي!
_ الله يرحمة
_ اي ، من رخصتك عمي ، تعبان وراجع للبيت..
_ ليش شنو تشتغل انت؟
_ عامل
_ مال شنو؟
_ احسن ماتعرف هسه ، خليها بـﻋـَدين تعرف عامل شنو..
درت ظهري راجع للفرع المعاكس ، احس ظهري نترس طعنات…
اكدر اشوف بعيونة خوف وقلق ورعب
يعرف مراح اعوفة ،احساسة صح مستحيل اعوفهم كلهم …
ركضت للبيت طبيت قفلت الباب الخارجي من جوة ، اخذت القفل الداخلي من سندانة الصبار فتحت الباب الداخلي طبيت…
البيت دافي نظيف ريحة دفو وصوبة شوية هدء كلبي من الرجفة
ماكو صوت هدوء حمدلله …
احسن شي من ارجع مااشوف عمتي ، تضل تحجي وتحرك كلبي..
سرعت خطواتي للغرفة ، اخذت منشفة سبحت لان المطر بارد جسمي ضل يرجف، اخذت حمام دافي ، طلعت بدلت كعدت على الجرباية اذكر…
قبل ٣ سنوات تعرفت على سليم بجامعة..
سليم جان انسان عادي يصعد كيات ويانة ، يوم ياكل وعشرة لا..
لحد مايوم من الأيام ، اجانة لابس رسمي وصاعد اغلى سيارة نازلة بذيج السنة..
الحجي اشكال طلع علية ..
اني جنت معتزل من الكل ،ماعدي حتى صديق مقرب
مرة جنة مجمعين بالكوفي الجامعة
جان عدنا واحد اسمة احمد ابو تاجر ملابس وعدهم محلات بهواي أماكن ومجان عدي شغل ، حجيت ويا احمد سليم سمعني..
أسحاق: أحمد عادي كول لابوك اي وكت اضل اشتغل حتى اذا شفت ليلي فدوة ، بس محتاج الشغل ضروري..
احمد: ولله هوة عدنا عمال ، بس احجيلك ويا تدلل
_ مشكور
_ نفس اليوم اجاني سليم العصر وعرض علية الشغل ، طلعنا من الجامعة صعدت بسيارتة هوة يسوق اني ارقب الطريق احفظ الاتجاهات ..
سليم: وداعتك يا أسحاق سنة سنتين تكول الف رحمة على والديك سليم من شغلتني هل شغل..
_ نشوف سليم لا تسبق الحدث ، اذا الشغل معجبني انسى تشوف وجهي ..
ضل يمشي بين الأفرع وطلع على الشارع العام ..
مااحس الة وصلنا لمنطقة اذكر ممنوع احد من المواطنين العادين يدخلون ، وكفت سيارتة بدخول طلعلهم باج فتحولة الطريق
اني ارقب بتصرفاتة والبلمكان الي احنا بي..
_ احنا بالخضراء؟ شلون طبينا وشنو الشغل هنا؟
سليم: اصبر اصبر دقيقة وتسمع بأذنك
مشت السيارة مسافة واني ؏ـيونَي ترسم القصور البداخل هل منطقة شـَڪد مجانو يوصفوها، مو مثل من تشوفها بالواقع عبالك قطعة من الجنة..
كل قصر كدامة حرس وسيارات تحس روحك طاب فلم..
طب بشارع عريض فتحولة الطريق، طبينا حديقة جبيرة حيل وحرس بكل مكان وصلنا للباب طفة السيارة وباوعلي..
سليم: هذا بيت استاذ قاسم ، اي شي يحجي انت اسكت بس اسمع وبعدين نتناقش تمام؟
اذا مشيت وراي يوم من الايام يكون بيتك هنا..
_ الله يستر شنو المقابل..
_ اسمع ونقرر
نزلت هوة لابس رسمي ونظارات ..
واني جاي بالقميص والبنطرون مال ابوية الله يرحمة
طب رجال ضخم للقصر شوية ونزل رجال يطلع عمرة بالاربعينات لحيتة بادي بيها خيط الشيب ، شعرة مسرح لابس بدلة رسمية ، حاط نطارات اوربية وكلة يلمع نزل باتجاهنا مخاطب سليم:
_ خالد هذا ايوب الحجيتلي عنة؟
أسحاق : يا أيو***
سكتني سليم يحجي بسرعة ويا: نعم استاذ هذا ايوب حسين الولد الي محتاج شغل ، استاذ هذا الولد اني اضمنة امين وكلبة حديد
قاسم: اهلا ابني تشرفتك بيك ، اني اسمي قاسم اكيد حجالك عني خالد..
عيوني ضلت تتحرك على سليم وعلى الرجال ، منو ايوب منو خالد شجاي يصير مديت ايدي سلمت علية..
_ الي الشرف بمعرفتك استاذ
قاسم: مبدئياً لازم اسوي اختبارت للزلم التشتغل عدي ، حتى اضمن مستقبلي ومستقبلهم وكل مانجحت بااختبار تقربت الي مرحلة..
_ فهمتك
_ حلو مادامك فهمتني ، ابدي من اليوم ..
_ شسوي استاذ؟
_ جايتني بضاعة بَريق (Bariq) جبيرة انت وخالد استلموها وزعوها، من تخلصون تعالو استلمو حصتكم..
أسحاق: استاذ شنو بَريق؟
سليم: شبيك ايوب مو فهمتك نسيت يلا امشي نروح ، إستاذ شكرأ لثقتك وراح نكون عند حسن ظنك اكيد..
شال ضبة دولارات حطهن بيد سليم قاسم : هاي عربون واطي نسبة لصاحبك يلا بالتوفيق..
صعدنا بسيارة طلع بهدوء من القصر وقاسم دخل ..
بس عبرنا فرع قصرة داس بانزين وطار بينا طير..
أسحاق: راح اطب بالقصور سليم فهمني، ليش يسموك خالد ليش كلت اسمي ايوب ، وشنو هذا البريق فهمني لا اموتك بمكانك .. وين جايبني انت! منو هذول الناس؟..
سليم: البريق جرعة مخدرة ناخذها من التجار ونوزعها بنوادي ، نستلم فلوس نجيبها لقاسم يطيك حصتك، من راح تاخذ حصتك راح تعرف شنو جنت اقصد بذهب..
_ سليم انت تخبلت اني كلتلك مستحيل اسوي شي يغضب رب العالمين .. ولك مخدرات تريد ابيع؟ من كل عقلك انت؟
ساق بسرعة طالعين من المنطقة ضل ساكت لحد موصلنا للشارع
طب بفرع طفة السيارة وباوعلي..
_ من فترة مراقبك أسحاق ..
انت ترجع مشي لان ماعدك فلوس تكسي ، اختك مراهقة لليل بشارع تشتغل! ترجعون مشي ثنينكم عمامكم ماكليكم وعمتكم متعبتكم
واكل ماعدك تاكل..
جاي اكلك سنة مو اكثر جرب وشوف وين راح توصل!
أسحاق: مستحيل سليم انسى
وصلني للبيت وشكرا لان فكرت تساعدني، بس اني مستحيل اشتغل هيج شي..
_ براحتك ، بس عدك وكت للمغرب ترجع تردلي خبر
لان لازم اخلص توزيع قبل الفجر..
هزيت ايدي مراضي الطريق كلة استغفر
سليم مشغل اغاني مسلطن يغني وياها
_ من شوكت تشتغل ويا؟
سليم: مو هواي من ٢ سنتين هيج
_ ليش ؟ ليش لجأت لهيج شغل!
_ الدنيا ماترحم الضعيف..
_ خوش هيج ماترحم الضعيف
فقررت تصير انت والدنيا على الضعيف
سليم : ان لم تكن ذئباً أكلتك الذئبُ
ضحكنا ثنينا وصلني للبيت ..
سليم: فكر مرة ثانية منتضر اتصالك ، هاك هاي حصتك .. فتح الفلوس سحب بالمليون حطهن بحضني
_ سليم صدك تحجي مااخذهن!
_ دخذ مصرف واذا قفلت فد مرة اعتبرها هدية مني
ادري ماعندك مبايل اتصل علية من العمومي هذا رقمي
كتبلي رقمة بورقة واطانيا اخذنة حطيتة بالبنطرون..
أسحاق: انسى سليم مستحيل
سديت الباب رفعتلة ايدي طبيت للبيت لكيت عمتي بوجهي..
كفاح: اهلا بالبومة اهلا بزلمتنا
ولك شوكت تصير مسؤل وتشتغل ، الثلاجة فارغة راح نموت من الجوع
واختك رجعت محروكة ايديها ودازيها ، مطيها تفاليس اعالجها بيهن اجيب اكل شسوي كلي؟
أسحاق: شبيها دموع؟
_ طب بغرفتي وشوفها
عفتها ادردم علينا وعلى عمامي الشمروها يمنا ورحت لغرفتها دكيت الباب واشوف دموع نايمة ايدها ملفلفات ، دموعها نازلة من عينها هيه ونايمة ركضت عليها كعدت يمها اخذت ايدها بيدي:
_ عمت عيني اخوج ، شلون احتركتي ياعزيزة كلبي
فتحت عيونها تباوعلي: أسحاق اجيت
_ اي يروح أسحاق اجيت ، متوجعة شلون احتركتي
دموع: مو شي قوي ام علي دزتني خافت علية ، نجويت بالمي من جاي اديرة بالمرك..
_ لاتشتغلين بعد افتهمتي! اني اشتغل واصرف عليكم
_ شتشتغل خوية هوة وينة الشغل
_ معليج كومي بدلي اخذج للمضمد
_ ماكو داعي والله هسه انام واصير زينة
_ تكومين لو اشيلج واخذج
كامت تبدل حطيت ايدي على جيبي اتلمس الفلوس ، طلعت من الغرفة ضربت كصتي حيل
_ يعني لازم اشتغل هل شغل ، ليش ياربي ماضلي خيار ثاني
كفاح: وين طالعين
_ اوديها للمضمد واجيب اكل
كفاح: منين توديها من كملاتك؟
_ عدي صديقي راح ادين منة ، باجر اطلع اشتغل تريدين شي؟
_ ي فدوة جيب منظفات ماضل عدنا شي ، وشوية مخضر ومسكنات لدموع ، يكفن فلوسك؟
_ اي لا تهتمين..
_ جا فدوة لحمة وياك نشف كلبنا من الطماطة والبتيتة
_ صار
باوعتلي مضيكة عينها : ولك سويحق بس لا عامل عملة؟
_ لا عمة ليش؟ شمسوي قابل
_ منين راح تجيب فلوس هل مصاريف كلها؟
_ كلتلج ادين
_ خير ان شاءالله لاتتاخرون. وتخلي بالي يمكم…
فزيت من صفنتي على صياحها…
كفاح: ولج مصخمة دموع تاخرتي على دومج لو اني اكعدج لو متكعدين ، سويحق اكعد يمعودين وينكم متو
عساكم بالموت واخلص..
باوعت للساعة ب٧ ونص اخذني التفكير مانمت استغربت دموع مجاي تكعد كمت لغرفتها دكيت الباب مجاوبت
فتحت الباب شفتها بثوب الصلاة نايمة رحت اندهها تكعد كامت تون
دموع : راسي ياربي راسي
أسحاق: شبي راسج دموع حاجيني شبيج
_ راسي اسحاق احسة راح يطك
_ شـَڪو بيش الساعة نمتي شنو مانمتي شو كومي
بس خل اشوفج
_ مااكدر ارفع راسي أسحاق اخ يابة
كفاح: ولكم مصخمين كولولي ها احجو مابية اصعد وينكم ليش متكعدون؟
طلعت للدرج اجاوبها : عمة كعدنا هسه ننزل
كفاح: وغمة هبط ضغطي كلت شمالهم ما يجاوبون شو مامتعاركين احنا شبيها دموع وينها ليش ماتجاوبني؟
_ راسها مأذيها هسه ننزل
_ سويت ريوك اني تعالو اكلو وياي
_ مااريد اني
_ ترة مااحطلك سم تعال انزل
عفتها تحجي طبيت لدموع لافة روحة دائرة ولازمة راسها
شلون الطفل بطن امه
_ بس فهميني شجاج
_ البارحة شربت حباية من هذني الجايبهن اذكر متت من الضحك ونمت وهسه كعدت راسي احس سجاجين تضرب بي
وكفت مذهول من حجيها : شنو
تشاقين وياي؟ ولج شلون تشربين شي ماتعرفي هذني مخدرات يثولة مخدراتتتت ولج!
دموع: ردت اجرب شمدريني هيج راسي يضل يوجعني
_ اموتج دموع اذا طبيتي لغرفتي اذبحج ، تشربين مخدرات الثولة ولج هذني بيهن ادمان تصير سالفتج تسولف بيها بعد اي جارة ما الج
_ وخر مني اسحاق مااكدر احجي وخر
_ كومي كومي اشربج كهوة برة هسه تصحصحين
_ اطلعني بفلوس حرام اسحاق
_ ديلا ليسمعج شاربة مي زمزم ومصلية بالحرم
غير تدرين مخدرات وشاربتها
_ اهوووو
_ كومي بدلي لبس مال طلعة اريكج برة
_ ماعدي هدوم
_ لبسي اي شي لعد ،اشتريلج اليوم
رحت لبست بنطرون ابوية وقميصي الاسود ،رشيت عطر ونزلت يم عمة حاطة الصينية بالكاع ،بيض سلك وجاي وغافية هيه وكاعدة كعدت كدامها..
_ عمة
كفاح: بسم الله الرحمن الرحيم زيد
_ حتى بنومج ممرتاحة مو؟ ولا راح ترتاحون مدام بركبتكم دم اهلكم
_ شوكت تفتهم ،احنا ماكتلنا احد
_ يممَڪٰن انتي لا ،بس اخوانج اي
_ دتعال تريك مليت من هل سالفة صار ١٠ سنوات نعيدها ، وين اختك شبيها اليوم حتى الدوام تأخرت علية..
_ تشكي من راسها ،اخذها مستشفى شتكولين؟
_ ولله عمة ماادري، بكيفك عدك فلوس
_ لا ادين شسوي..
_براحتك
كعدت يمها كشرت بيضة اطيتها الها والثانية الي، لفيتها بخبزة وشربت جاي اباوع عليها شـَڪد بشكل ، تشبه ابوية الله يرحمة حتى نص تصرفاتها ضوجتها حجيها، بس غسلو عقلها مع الاسف..
_ ليش صافن بوجهي؟
_ شـَڪد تشبهين ابوية
_ الله يرحمة ، حتى هوة جان يكول اخ يازيد ياخوية
متت انت وضلت العارية
_ يعني تعترفين اخوانج عارات
_ راح تخليني اتندم على الساعة لكتلك تريك وياي
_ اشاقة شمالج كوكو متتحملين شقة
هزت ايدها مبتسمة كتلها: صدك ليش ماتزوجتي جان هسه فروخج بكدي
كفاح: ولله يمة عمامك ياهو الاجة وطردو مايعجبهم
_ ولله عمة لاتكولين يمة بعد تلعب روحي ، اخوانج ميريدولج الخير من الاخير
_ الله كريم شلك بهل سالفة هاي هسه
_ مو ابو صديقي يريد مرة
_ شنو شبيك ابني تخبلت
_ اني مو ابنج
دموع: كملت اسحاق
_ يلا عمة طالعين
رحت يمها لزمت ايدها طلعنا من البيت خابرت سليم
_ ها سليم صباح الخير
سليم: ياخير شمكعدك لخاطر ربك وجه الصبح يلا رجعنا
_ ليش اني نمت اصلان ،اكلك هاي البضاعة الجديدة اذا واحد احذ منها وهوة عمرة ماشارب اي مادة مخدرة ، شيصير بي خاما يأدمن؟
_ لا يابة مو من اول حبة يأدمن اصلان، اول مياخذ يدوخ ويضل راسة يوجعة ونفسة تلعب بس بـﻋـَدين
جاي يكمل ركضت دموع للبيت مشيت وراها اشوفها ركضت للحمام تتقيئ فركت وجهي وكلتله : كمل سليم
_ شكمل شصاير شنو اخذت انت
_ لا يمعود شتدري بية ، بس هاي اختي اخ اخ شاربة منهن وهسه حالتها حالة..
_ شربها جاي كهوة منبهات شي هسه تصحة ،ولاتاكل شي لان معدتها تأذت هسه ماتتحمل تاكل اي شي
_ خوش سدة خل اشوفها..
طبيت دكيت باب الحمام شوية طلعتلي مغسلة سندتها وتمشينا لنهاية الفرع صعدتها بسيارة وصعدت
دموع: ولله تستاهل انت هذا الخير بس ياريتة بالحلال!
_ دموع ربي سكتي رحمة لله احسج ضميري كافي سكتي
_ سكتت شبيك..
___________
في داخل احد البيوت القديمة
الشر والسلطة هما الذان يحددان مصير الانسان عندهم
في غرفة يجلس ثلاث اخوة على طاولة طعام
لا يجمعهم من الاخوة صلة غير حب المال والشر والطمع
لدرجة لا مانع لديهم بالتضحية بااحد اخوتهم لأجل مصلحة البقية..
غايب : كلتلكم اكتلو هوة وعائلتة اغبياء
هاي ثاني مرة المح ابنة يحوم على بيوتنا طامع بالفلوس مثل ابو
خل نتغدة بي قبل لا يتعشة بينا
جاسم: نسيت اخوك هادي متحلف بيك
اذا صار شي على ولد زيد يخليك انت المسؤول
قادر: نفكر نخلص منة مثل مخلصنا من ابو ونكول حادث
غايب : صبرولي لعد بس احسبها عدل
جاسم : ونتقاسم كلشي بالعادل نفس ذيج المرة
قادر: تضل طماع
جاسم : يلا يالحنين ، هسه عساس انت شلونك
دك على الطاولة بيدة مسكت نقاشهم الجشع وهوة يكول
_ لكيتها…
_______
فصول الرواية: 1 2