رواية القلب بالقلب الفصل الخامس 5 بقلم روز الفياض – للقراءة المباشرة والتحميل pdf

بعدما جورية وامي حجولي على موضوع كرم ..

ضجت ..

اصلا انه ماحبيته ..

والحظ من حظي مصخم من يومه … ليش ياربي شني ماكو غير كرم بهالبلد كله ..

انجبي ..

انجبي …

انتي اتعافيتي على ابن ام ستار وابن ام طالب وعلى غيرهم هاي الله خوش جازاج …

اي صدك الله مايطك بعصه …

اكنس وادردم …

وعضيت ايدي من حركت كلبي بطبة امي ..

وكفت تباوعلي :

هاا … شمالج؟

بقيت ساكته ماحجيت ..

امي: شمالج خايبة شو احاجيج ماتحجين ؟

ياس: يمه رحمة لوالديج خليني ساكتة والطم على حظي ..

امي : عليمن تلطمين يمه شبيج … مو تردين تعرسين وتكولين هنا مسجونه ومحبوسه جا شتردين بعد ..

كملت كنس بسكته وبدل ماادردم بصوت عالي ظليت ادردم بكلبي ..

بالليل ابوي صاحلي بالديوانية ..

رحت وانه كلبي يدك عبالك وراي اعدام مو عرس ..

دخلت جانوا يمه اخواني وعمي ابو امير وامير ابنه ..

سلمت وكعدت بس استحيت كاعدة وحدي يمهم بس شوية واجت امي وجورية ومرت عمي كعدن يمنه ..

ساكتين محد يحجي بس يباوعولي ..

حصرتني الضحكة رغم جنت خايفة ..

عمي ابو امير اتنحنح شوية وبعدين كال :

بوية ياسه .. كالتلج امج على حجي عمج جبر وابنه ..

بقيت ساكته شوية بعدين هزيت راسي اي ..

عمي ابو امير : بنيتي عمج يريدج لابنه .. تدرين بعد انتي ابنه جان متزوج بس مرته مايصير عدها جهال وبينهم مشاكل ومطلكها ومن ابوج كايل لعمج على بيت ابو طالب عمج معترض وكال يردونج لكرم ابنه ..

ياس: بس هو مطلك .

عمي ابو امير : بوية الرجال مايعيبه شي غير جيبة مثلما يكولون الرجال شينقص منه لو طلك ماينقص منه شي … الرجال مايعيبه الطلاك قابل هو مره ..

ياس: عمي شلون مايعيبه يعني انه ماارضى بواحد مامتزوج ارضى بواحد متزوج ومطلك ؟

مرت عمي : جا شماله المطلك ياعمه شني اليطلك يكفر ..

ياس: جا بس المره التطلك تكفر؟

ابوي جان ساكت بس هنا حجه كال بصوت قوي :

المره عيب اتطلك عيب ماعدنه بنية مطلكه لان عيب التتزوج بعد تبقى عد رجلها للموت …

سمعت عمي عارضه بلطف:

لا بويه المرة ماتطلك بسهولة صعبة ماتطلك الا اذا شي كلش قوي ماينحمل … المره تتحمل بوية مو مثل الزلمة .. كل الحمل عليها …

ابوي رد بنوع من العصبية جنه ماعجبه حجي عمي:

البت التطلع من اهلها ماترجعله بس خطار …

بقيت ساكته ماعجبني الحجي رغم اعرفه كلش زين واعرف اراء ابوي وطريقة تفكيره من دون اخوانه كل شي عده عيب ومايجوز ..

امير : هسه احنه نريد نعرف انتي شتكولين بشنو تفكرين ؟

ابوي رد عليه قبل لا احجي :

هي جاهل وين تعرف تفكر زين ..

هزتني حجايته شايفني مااعرف افكر ولاافتهم ..

امي: لا شبيها جاهل مره طول بعرض الازغر منها عرسن وصارن امهات .. قابل بنات العالم احسن منها ..

امي كالت بلطف وهي تمسح على ظهري هسه فعلا حسيت همه شايفيني ماافتهم يعني ابوي يكول ماتعرف تفكر وامي تحاول تقشمرني بكلمتين ..

عمي ابو امير: بنيتي ابن عمج يدللج ويحطج على راسه .. هذا امير مو ماخذ جورية اختج زعلها بيوم؟ سمعها حجاية؟ مايكدر لان هاي عرضه ودمه ولحمه .. وشحده يدوسلها على طرف وانه موجود ادفنه بمجانه ..

ضحك امير على كيف هو وجورية وانه ابتسمتلهم ..

ابوي : بويه حضري روحج راس الشهر زفتج على ابن عمج .. ولد شاغول عده شهادة عده مختبر وابن عمج اذا انتي ماترضين بي جا ياهي ترضى بي غير انتي بت عمه وحزام ظهره ..

رفعت شوفي لابوي كتله بحزن:

انه حزام ظهره ؟جا هو شنو؟

كال ابوي بعصبية :

وهو هم حزام ظهرج .. المره من تعرس رجلها يصير ابوها واخوها ..

ياس :واذا هو مارايدني؟

ابوي: جا ياهو الخطبج ؟ المن خطبج كون مايريدج؟ يريدج يريدج هو وين يلكه احسن من بنات عمامة ..

مصعب : خوية الولد انتي ماتعرفينه مايصير تكشين منه وانتي لاحاجيه وياه لاكاعده وياه … باجر من تتزوجون تعرفينه عدل ويصير اعز من عدنه هههه ..

ضحكوا كلهم بس انه ماادري حجيهم صحيح لو لا ..

ماادري خوفي هذا طبيعي لو لا ..

من حجيت ويه جورية اختي كالت:

كل البنات تره هيج مو بس انتي … انه مو جنت احب امير بس هم خفت من خطبني … هو صدك باعتبار غريب عنج لان مانعرفهم زين بس هم يبقى ابن عمج وعزيزه عليه … يداريج احسن من الغريب وعمي يمج مايرضالج بالشينه ..

ياس: مو جنتي البارحة ماراضيه شو اليوم رضيتي؟

جورية : انه ماراضيه لان الزواج مسؤولية وتعب واخاف عليج انتي متعودة هنا بيت ابوج وماخذه راحتج بس هناك بعيدة وبحدج هنا يمج فهيمة وسلامة خواتج يعلمنج ينصحنج بس هناك ياهو الج ياهو يعلمج … اهل الولاية ذبتهم غير مو مثلنه .. واهل بغداد مو مثل اهل الولاية كل ولاية شكل وانتي رحتي وشفتي واجيتي متعجبة …

ياس: يعني هسه شسوي؟شكول؟

جورية : شتكولين بعد ابوي اطه كلمة لعمي بساعة الحاجاه كله كبع واخذ بدون لاخطبة ولامهر ..

ياس: يححح حتى مهر ماكو .. جا بيش اتعيقل واتشيم جدام البنات؟ لا والله الا اروح لابوي هسه واكله اريد خطبة ومهر اريد كون السلف ينترس سيارات من الراس للراس واريد زلم معكلة تجي بمشيتي جا انه وحد من بنات اخوانه ونسابته؟

بعدها جورية مالحكت تجاوبني وانه فتحت الباب وطبيت على ابوي وعمي بالديوانية وجان ابوي يحجي بالتليفون بس ماانتبهت:

بوية .. بوية .. جا شني كايل لعمي لامهر لامشية جا قابل انه فصلية .. ابن عمي على عيني وعلى راسي بس انه اريد مشية زلم ومهر جدام العالم والناس اريد اتشيم جدام بنات عمومتي وخوالي جا انه وحد من البنات ؟

عمي ضحك كال:

حكج ..حكج .. احنه نمشيلج تدللين ..

ابوي استمر يحجي بالتليفون بس يباوعلي :

اي هايه ياسه .. اي هههههه ..تريد مشية ومهر ههههههههه ..

هاا اي بعد هي بتكم ماتحتاج انتم جهزوها وابو امير هليكللها نمشيلج تدللين هههههه .. هاا اي هلا بيكم .. هلا بيكم ..

بقيت واكفه وصافنه على ابوي لحدما سد التليفون وكلي :

هاا ياسه .. هذا عمج جبر سمعج تكولين اريدن مهر ومشية هههههه ..

يكول صار تدلل ياسه نجيها وشكد تريد مهر يجرالها .

ابتسمت ابتسامة شكت حلكي من الاذان للاذان ..

رحت اركص يم جورية وامي وجان يمهن فهيمة وسلامة ظلن يضحكن مستغربات كالت امي:

هاا .. شو ركصتي توج معنفصه ؟

ياس: كلت لابوي اريد مهر ومشية زلم ..

سلامة : فلاشه .. ماتخاف هالبت ..

ياس: عليمن اخاف وحد عنج مو مشولج ؟لو ياسة كملتها بكعه ..

جورية: ولجن عوفن المداهر هسه كولي شكلج ابوي ؟

درت على جورية واتخوصرت وكتلها بابتسامة :

ابوي جان يحجي ويه عمي جبر وعمي جبر سمعني من كلت لابوي اريد هيج وهيج وكلي يجرالج تدللين مهر ومشية ..

امي: اي خوش .. صلاوات على محمد

جورية: شتردين بعد فرحي هسه ..

.

.

.

.

اسبوع خلصته صفنات احس روحي دايخه ماادري شبيه لافرحانه ولامو فرحانه .. ماعدي رد فعل ماادري شبيه بردت خلصتها تفكير ..

خاف صدك انه مااعرف افكر واتصرف ..

خاف انزل راس ابوي واخواني وافشل امي جدام مرت عمي ..

خاف انه هم مااحبل مثل مرته ويطلكني ..

يححح …

شلون يطلكني وانه بت عمه غير ابوي يذبحني ويذبحه …

خلصت الاسبوع بهالافكار منا لحدما خابر عمي كال الجمعة نجي نخطب وراح ينزلون عد بيت عمي ابو امير ..

ومرت عمي حجت وياي وانه حسيت عبالك اول مره احجي وياه شو استحيت منها :

ياسه حبيبيتي لتجهزين اي شي اني منا راح اجيبلج فستان واكسسوارات وحتى الذهب منا راح اشتريلج على ذوقي انتي اريدج ترتاحين متشيلين هم اي شي زين حبيبتي ؟

ياس: ان شاءالله ..

بس هالكلمة حجيتها … لساني عبالك بلعته ..

اتفقت مرت عمي ويه امي على كل شي حتى هي مشية زلم وهي مهر ونلبس حلقات ..

هي تجيبلي بدلة وهي تختار الذهب حتى الحذاء هي تجيبه وانه ارتاح بس يا راحة …

الخوف اكلني .. حتى الاكل كطعته من التفكير ..اجوا قبل الخطبة بيوم واجتنه مرت عمي جابلتي نفنوف وشافت خاف ناقص شي ..

جانت جورية اختي على اساس تريد قبلها بيوم تاخذني لبيتهم حتى توديني مناك للصالون بس مرت عمي مارضت ماادري ليش ..

ثاني يوم من الصبح كعدت سبحت وهي من البارحة كلتلي شعرج الصبح نشفيه لاتلفينه ولاتظفرينه ..

رغم الليل كله مانمت افكر بس الصبح كعدت نشيطة ..

كالوا الزلم الساعة ب( ٢ ) يجون ..

معناها وره ماتفض الزلم يجي كرم حتى نلبس الحلقات ..

اجت مرت عمي من الصبح يمي هي جهزتني ولبستني وسرحت شعري ..

ماعرفت روحي اول مره احف حواجبي واعدلهن .. واول مره اخلي مكياج واول مره اكشخ هيج ..

ظليت واكفه كبال المراية واتفرج على روحي وفهيمة كل شوية تكمزني بهلهوله ..

وامي خنكتنه بالحرمل وسلامة كاضه فروخها حتى لايجون يكعدون يمي بس مايفيد كل شوية يزرك واحد للغرفة ويتحنط كبالي ..

بعد ماعقدلنه السيد اشتغلت الهلاهل والهوسات وطلعوا الزلم اتوجهوا لبيت عمي ابو امير …

انتقلنه احنه النسوان لديوانية الزلم لان اكبر وظلن بناتنه يركصن ويغنن ويهلهلن وانه كاعدة ومسوية روحي عاقله ولازم ماارفع راسي واباوع لاتجيني كفخة من امي ..

بس الصدك اتمنيت روحي وحده من المعازيم حتى اخذ راحتي اركص اهلهل احش بالعروس والعريس ..

اجه العريس اجه … الجهال اجت تركض وتصيح كلبي ظل يدك حسيت روحي احتريت اشرت لجورية تفتح السبلت رغم شتا بس اهلنه هواي وبناتنه وصار نفس وحاره ..

عبالي بس انه محتره بس من دخل كرم بهوسة الهلاهل والصفكه وكعد يمي شوية وفتح دكمة القميص انتبهتله وبعدين كام نزع الستره ..

جنت اتمنى اتزوج واحد جرئ مو خجول واحد رومانسي مثل المسلسلات التركية ووسيم على كولتهم ..

ظليت اباوعله من جوه ليجوه ..

ابيض عنده لحية خفيفة شوية بيها لون يعني مثلي شعري بي لون ويمكن عيونه هم بيهن لون ..

زين اكو اشياء مشتركة ..

اول خطوة من لبسني الحلقة ماحسيته خجول رغم ماباوعلي ولبسني الذهب وهم ماحسيته باوعلي ..

بس تصرفاته عادية مو مال واحد مستحي او خجلان لا يعني مرتاح يمكن لان كل احنه اهله وكرايبه او يمكن لان مو اول مره يخطب ويتزوج؟

جنت اتمنى نروح نطك صور عد المصور بس بعيد علينه كللش بالولاية ..

بس البنات عدهن كاميرات ومرت عمي ولنى بتها كالن نصور بالموبايل وبعدين من يرجعون لبغداد يطبعونهن ..

كل اللقطات جانت عادية

امه تكله خلي ايدك على جتفها يخليها .. خلي ايدك على خصرها يخليها ..

بوس راسها .. باس راسي ..

حسيت بالغرابة يمكن لان مااعرفه او يمكن لان كل بناتنه اتزوجن منه وبينه فماجان اكو ذاك الخجل والبرود ..

المهم …

وره ساعتين كاملة من الركص والهوسات تعبن الحبايب ..

وانه دخت وهو هم حسيته داخ رغم ماحجه بس جان يبتسم بين فترة وفترة ويجاوب عادي على كل اللي باركولي وباركوله وعلى كل اللي وصوه عليه ..

جان يكول :

ان شاءالله ..

مرت عمي جانت فرحانه ولنى جانت اكثر وحده متونسه وكل شوية تصورني ..

بعدما طشن الحبايب هو راد يطلع يروح لبيت عمي بس مرت عمي مارضت :

لا يووم لا .. ابقى يم خطيبتك هسه البنات يطلعون وابقى يمها كعدوا اتعرفوا على بعض ..سولفوا ماعدكم سوالف؟

ماحجيت شي ولاهو حجه ..

خلال دقايق فرغت الديوانية ..

الكل طلع وخلوا الباب موارب خاف يجي ابوي لو واحد من اخواني زحمة مايقبلون نكعد بحدنه ..

جنت صافنه عالباب لحدما انتبهتله اتنهد والتفت علي ..

لااراديا التفتت عليه ..

باوعلي شوية .. استحيت ..

ابتسمت شوية وهو هم ابتسم بعدين كال :

راسي صار طبل ..

ضحكت ..

كرم : ليش تضحكين؟ مادختي لو انتي متعودة على هالاجواء؟

ياس: ليش انتم من تصير عدكم مناسبة ماتهوسون لو ماتركصون؟

كرم : لا الهوسه والركص والدوخة بس يم النسوان احنه غير عالخفيف هههه ..

ماادري ليش من ضحك ارتاحيت ..

لزم ايدي جلدي حسيته كزبر ومثل البردت ..

باوعلي كال :

ياسه ليش قبلتي بيه؟

اتعجبت من سؤاله ومادريت شجاوب بالبداية بس بعدين كتلة:

انه ماجنت قابله بالاول..

سألني بفضول :

وبعدين ؟

ياس: بعدين كلها كلتلي ابن عمج يداريج ويصونج ويدير باله عليج .. احسن من الغريب .

كرم : زين ماخفتي من عرفتي اني متزوج ومطلك قبلج ؟

ياس: لا .. ماخفت بس الصدك ماجنت قابله اتزوج واحد مطلك حتى لو ابن عمي .. يعني صدك انه مو مثل بناتكم ولامكملة مدرسة وعيوني تك وتك بس هم ماارضاها على روحي ..

من كلت تك وتك ضحك على كيف بس من كلت ماارضاها على روحي سكت …

كرم : وهسه؟ يعني انتي هسه مجبورة؟

ياس: لاا مو مجبورة بس قنعوني يعني ابن عمج ومن هالحجي .

ضحك حيل وسكت كال:

هو من هالحجي ..

بالهاللحظة ماحسيت روحي مستحية منه باوعتله ردت اشوف شكلة ملامحه شلون صايرة ..

انتبه علي اباوعله كلي :

هاا مطابق للمواصفات؟ هههه ..

ياس: لاء

رفع حاجبه كال:

شلون بالله؟

ياس: جنت اتخيل روحي متزوجة واحد اسمر اجلح ..

ضحك حيل من كل كلبه بعدين كال:

من اجيتينه مالج صوت بالبيت اشو هنا ماخذه راحتج لو لان بعدج عد اهلج ههههه ..

ياس: جا غير جنت جايتكم خطار مايصير من البداية امصخها ..

بقى ساكت شوية بعدين كال:

عندج بعد اسبوعين او تلاثه بعدين تجين لبغداد … بالبداية يجوز صعبة عليج وحدج والبيت هادئ مو مثل هنا ماشاءالله ناس طول الوقت رايحه جاية جيران وكرايب .. بس بعدين تتعودين … بس الج مطلق الحرية امي وياج ولنى تردين تطلعين تشترين تتونسين تلبسين براحتج ..

يعني هذا بيت اهلج وهناك هم اهلج وابوج مو عمج طبعا ..

واني ماراح اقصر وياج ان شاءالله …

بقيت ساكته ماادري ليش ماعجبني الحجي وضجت فجأة بدون سبب ..

مااعرف شنو اللي بحجية ماعجبني رغم حجية حتى بالاحلام مامتمنيته ..

البس براحتي ..

اطلع واطب براحتي ..

اشتري براحتي ..

كله براحتي مو هذا معنى مطلق الحرية ؟

.

.

.

بعدما طلع وراح لبيت عمي ابو امير جانوا الكل معزومين هناك عالعشه ..

عمي ابو امير ذابح بهالمناسبة والزلم كلهم متجمعين عدهم والنسوان عشاهن عدنه ..

اجت مرت عمي دخلت يمي بالغرفة كعدت يمي جنت كاعدة امسح المكياج كالت:

هاا مسحتيه .. اي ماتحتاجينه الحلو حلو من الله وانتي حلوة .

اتدنت علي شوية كالت:

هذا موبايل جابه الج كرم حتى تكدرون تتواصلون ..

ياس: مشكور

ام كرم : حبيبتي ياسه ادري بيج انتي ماطالعة ولاتعرفين ترحين للسوك وبعيد عنكم السوك الجبير اصلا .. فاني اتفقت ويه امج اني راح اجهزج شنو تردين شنو محتاجه كتبيلي بورقة واني راح اجيبلج احلى شي واحسن شي كوني على ثقه ..

ياس: اعرف عمه بدون ماتحجين هذا النفنوف الجبتيلياه يخبل وانتي ذوقج حلو …وانه هم مااريد اشتري شي مايعجبكم بعدين .. بس انه تعرفين لبسي حتى لو ابدل البس فوكاهن عباه ..

ام كرم : براحتج ..