رواية انتقام القدر الفصل الخامس 5 بقلم ولاء حامد (الرواية كاملة)

رواية انتقام القدر الفصل الخامس 5 بقلم ولاء حامد

رواية انتقام القدر الفصل الخامس 5 

 البارت الخامس

قدر دخلت الشركه بثقه عكس المره اللي فاتت كانت داخله خايفه ومتردده  لينا بترحاب  نورتي يا قمر  

قدر منور بيكي يا اختي ولو انه منور من كتر الكهارب اللي ملياه من ساسه لراسه يابت داه تلاقي فواتير الكهربا خاربه بيوتكم ولا انتو ممارسه مش عداد

لينا بضحكه عاليه والله انتي مشكله ومالكيش حل بجد طب تعالي بيجاد مستنينا في مكتبه

قدر يلا يا اختي خلينا نشوفه عايز إيه  

طلعو مع بعض وانضملهم يزن 

قدر ازيكم يا جماعه عاملين ايه

بيجاد تمام الحمد لله

قدر تحمده على خير يا اخويا خير 

بيجاد بهدوء عايزين طلبيه تانيه بس قد اللي فاتت الطاق اتنين او تلاته على حسب ما تقدري 

قدر من نحيه اقدر فأنا اقدر ونص وتلت ارباع

بيجاد تمام كويس اوي 

قدر اه كويس بس بردوا يا اخويا هاتمضيني تاني على إيصالات امانه 

بيجاد بص للينا بغيظ اللي ابتسمت وسكتت

بيجاد خد نفس وهز راسه لاء يا ستي مفيهاش إيصالات تاني خلاص كانت أول مره بس علشان كان أول تعامل بينا كضمان وانا كنت قلقان وخايف على جوده الشغل انها متكونش قد المستوى المطلوب وكمان متنسيش ان المبلغ مكانش قليل احنا كنا بنتكلم في ملايين وقتها 

قدر بشرشحه طيب كويس يا اخويا انك اطمنت وطمنت بالك وصرفت عشه الفيران اللي كانت سارحه في عبك دي 

بيجاد بذهول وعنين مبرقه فيراااان

قدر برفعه شفايفها لفوق اه يا اخويا فيران متعرفهاش الرصاصي دي اللي بتبقي في المجاري دي يا جده دي معلمه على نص بيوت جمهوريه مصر العربيه اللي كلت خشب واللي اروضتله هدوم 

لينا كشت وشها بقرف يااااع

يزن ضحك بصوت عالي وإيجاد بصله بغيظ وكزه سنان حط ايده على بوقه يكتم ضحكته سوري سوري كملو يا جماعه 

بيجاد نفخه طب مش نتكلم في الشغل احسن

قدر شوحت بإيديها اومال يا اخويا احنا جايين نتسامر مهو انا مش جيالاك على ملا وشي وسايبه اللي ورايا واللي قدامي وراقعه مشوار  يقطع فرط الحمار عشان نقعد ناخد وندي مع بعض وتحطلي البتاع داه اللي لا ملهوش لا طعم ولا لون داه 

بيجاد داه عصير افوكادو يا بيئه 

قدر يا اخويا بلا افوكادو بلا افاوكاتو دانا لا عارفاله لا اسم ولا لون وطعمه استغفر الله اهي كلها نعمه ربنا يا اخويا كنتوا جبتولنا كوبايتين عصير قصب اهو حاجه معروفه مفهومه وكلها فيتامين 

يزن قصب 

قدر بلاش قصب لمون اي حاجه اعرفها 

بيجاد بهمس ايش فهم الحمير في أكل الجنزبيل مهي آخرها تاكل برسيم 

قدر بزعيق متعلي صوتك داه يا اخويا شويه مبحبش انا الودوده دي لو عندك كلمتين عاملينلك مغص في بطنك قولهم هانسمعهم ونبلعهم ونسكت واهو لا من شاف ولا من دري 

بيجاد ميل على يزن طب دي اقوم اطبق في رقبتها واخلص واخلص البشريه كلها منها ومن لسانها 

يزن بإبتسامه اهدا اهدا يا حبيبي انتا اللي محتاجها عشان شغلنا يمشي فخد نفس كده وريلاكس خالص من فضلك

بيجاد خد نفس طويل وغمض عنيه لثواني وقدر يتمالك اعصابه تاني  طيب بصي سبق وقولتلك اني عايز طلبيه ضعف اللي فاتت الطاق اتنين او تلاته اللي تقدري تجهزيه قد ايه وهياخد معاكي وقت قد إيه 

قدر عوجت رأسها على جمب يا اخويا هو انا بنجم ولا بضرب الودع ولا يكنش بشم على ضهر ايدي مثلا 

بيجاد بعدم فهم انا مش فاهم انتي قولي ايه ممكن تفهميني داه بعد اذنك طبعا 

قدر  يا اخويا اما مبضربش الودع انا

بيجاد ضرب كف بكف لا حول ولا قوه الا بالله يا بنتي متفهميني علشان اقدر اعرف الطلاسم دي كلها لايه

قدر بصوت عالي يعني انا ايش عرفني انتا عايز إيه وقد ايه وكل نوع منه كام عشان اقدر اقولك بكام وهياخد وقت قد إيه 

بيجاد ااااه طيب متقولي كده على طول بدل الأسلوب اللي انا مش فاهمه داه اصلا 

قدر بنفخه يا مثبت العقل والدين يارب 

بيجاد طيب انتي اخذتي وقت المره اللي فاتت حوالي تلات ايام 

قدر ايوه تمام لاني كنت عارفه الشغل المطلوب

بيجاد حلو اوي طيب انا عايز من نفس الأنواع اللي فاتت ولو فيه أنواع جديده قدامك وانتي شايفه انها هاتمشي في السوق وفي احتياج ليها اوكي معاكي جرين لاين في التعامل فيها

قدر نفخه بطفوليه هارجع واقولك اعدل لسانك معايا والنبي مش هانقضيها احنا ترجمه جوجل عشان نفهم بعض داه النبي عربي عشان نعرف ناخد وندي مع بعضينا كده زي خلق الله 

بيجاد بصلها وهو على اخره 

قدر كملت ولا كأنها شايفه عصبيته اللي بيحاول يكتمها طيب المره اللي فاتت خدت تلات ايام المرادي اقلها اسبوع بس همتك معايا وشخلل جيبك كده

بيجاد بصلها وحرك عنيه يمين وشمال وكرر الكلام بعدم وعي اشخلل جيبي وبداء يحط ايديه على جيوبه ويفتشها ويحط ايديه فيها يشوف ايه اللي بيشخلل فيها بص لمازن رفعله اكتافه مش فاهم ورجع بص للينا اللي هزت رأسها بمعني معرفش 

بيجاد مط شفايفه مفيش حاجه بتشخلل في جيوبي انتي سامعه حاجه انا مش سامعها 

قدر خبطت على وشها بكفها ومسحت وشها بغيظ لا يا اخويا كف الله الشر انا مش قصدي جيبك بيشخلل هو احنا جايين من المولد جايبين شخاليل وزماميز  شخلل جيبك يعني فلوسك 

بيجاد خبط على المكتب بعصبيه خوفت الكل متقولي فلوسك على طول وبتقوليلي انا اعدل لساني بدل عوجته متقوليلي انتي كلام أفهمه 

قدر عوجت بوقها يمين وشمال كلام تفهمه دانتا المفروض ابن سوق يعني تبقى حركي كده وفهم  تلقطها كده وهي طايره 

بيجاد وهو ناقص العياط القطها وهي طايره منك لله يا لينا 

قدر بعصبيه على ايه يا اخويا تدعي على البونيا  مبناقص ال يا نحله لا تقرصيني ولا عايز عسل منك 

يزن أتدخل علشان يهدي الجو يا جماعه اهدوا مش كده الكلام اخد وعطا اهدي يا انسه قدر ومسك ايد بيجاد وانتا كمان اهدا ها متقفش على الوحده اوي كده

قدر يا اخويا انا هاديه هو اللي حزوء وكل كلمه مني بتقف في زوره وتعرض بالعرض لا بالعني ولا هاضمني

يزن بتعقل خلاص يا انسه نكمل كلام في الشغل احسن

بيجاد يكون احسن من الكلام الفاضي داه

قدر يستحسن 

بيجاد طيب انتي المره اللي فاتت اخدتي عربون تلاته مليون انا بردو المرادي كمان هاديكي عربون زيه بس هازود عليه شويه كمان

قدر لا يا اخويا خلي ايدك فرطه كده وسخيه دانتا طالب الطاق طاقين وتلاته واربعه وخمسه في عين العدو غير الجديد كمان يعني مش تزود شويه لاء دانتا تبحبح ايدك وترحرحها 

بيجاد يعني ايه 

قدر يعني فلوسك في الحفظ والصون رايحه عندي راجعالك بضاعه ع الفرازه منقوضه بالحته والبضاعة  بتجر فلوس السوق لا يقصر ولا يسوق  يعني الفلوس بتسوق فلوس في فلوس في فلوس اللهم لا حسد 

بيجاد طيب بغض النظر عن كل الكلام اللي انا مفهمتهوش داه ومش عايز أفهمه اصلا ومش هسألك فيه علشان عارف اني مش هاخد معاكي لا حق ولا باطل نتفق احسن على المبلغ المطلوب 

قدر  والله كلك نظر شوف انتا عايز قد إيه واللي يشر منك يكفي

بيجاد يا انسه قدر احنا بنتكلم في شغل ملهوش دعوه بالنظر وطوله وقصره احنا مش عند دكتور عيون 

قدر خمست في وشه خمسه خمسه عليا وع اللي حواليا انتا بتفول عليا في وشي دكتور عيون مين كفا الله الشر ربنا ميجعلنا دخله عليهن ولا يجعلهم دخله علينا متقول كلمه حلوه اومال 

بيجاد بنفخه  بردوا مش هاجدلك لا كلمه حلوه ولا كلمه وحشه علشان انا على تكه وهانفجر فيكي وفي الشركه وفي نفسي  

قدر طب خد بارد بدل النفخه اللي طلعت حرقتنا دي وانتا عامل زي انبوبه البوتجاز اللي جلدتها خربانه 

بيجاد وشه احمر من العصبيه وقبل ما يتهور يزن مسك ايده  اهدا الله يسترك ها اهدا وسيبنا احنا نتصرف

بيجاد بهمس كل ما بتفتح بوقها ببقى عايز امسك دماغها وأفضل اخبطها في المكتب لما يجيلها ارتجاج تفقد الذاكره اي حاجه ترحمني من طوله لسانها وكلامها بتعصبني يا يزن

يزن اهدا واسكت انتا واحنا هانتصرف ماشي 

بيجاد ماشي لما نشوف اخرتها

يزن اخرتها  تقتكر ان شغلنا في ايدها متنساش دي وحطها في بالك دايما داه في حد ذاته يخليك تبلعلها كل الكلام الغلط مهما ان كان 

بيجاد وانا مصبرني على المصيبه دي غير اني محتاجلها 

يزن يبقى اهدا خالص وانا ولينا هانخلص ولو عايز تطلع وتسيبنا نكمل اوكي وانا هابلغك بالاتفاقات تمام 

بيجاد لا انا قاعد لما اشوف اخرتها 

يزم ماشي بس متتكلمش وانا ولينا هانخلص الموضوع اعتبر نفسك يا سيدي ضيف شرف ولو الكلام معجبش ابقى أتدخل 

بيجاد بتنهيده ماشي انا اصلا معنديش حل تاني غيره 

لينا حست بصعوبه الموقف وأتدخلت بسرعه طيب خليكي معايا انا يا قدر 

قدر يكون احسن واهو ناخد وندي مع بعضينا بدل اخوكي اللي عايز الكلام ماشي بالمسطره داه 

لينا ماشي انتي كده هاتحتاجي  عربون كام  وكملت بشرح للتوضيح لان التعامل هنا كله بنكي لان مفيش المبالغ دي كلها في الشركه دي بتبقى اعتمادات بنكيه لان دي فواتير وداخله خارجه ومسجله علشان الحسابات والضرائب والجرد السنوي وتقفيل السنه الماليه يعني موال طويل يعني انتي في غنى عنه

قدر ماشي ماليش دعوه بورقكم وحاجتكم انتوا ادرا بيها مني انتوا دلوقتي عايزين بضاعه قد بتاع المره الي فاتت وبزيادة كتير اووي غير الجديد كمان انا خدت عربون تلاته مليون في بضاعه ملت عربيه واحده المرادي بضاعه عايزه عربيات وكمان انتو سهو عليكم أن العربيات دي بحساب لوحدها وانا شيلتها النوبه اللي فاتت مجدعه مني 

يزن ماشي يا ستي شوفي العربيات اللي انتي عايزاها محتاجه كام عربيه والشركه هنا هاتوفرهوملكم بسواقين كمان يعني ولا هاتتعبي نفسك ولا هاتكلفي روحك

قدر بتريقه لا والنبي ايه ليه شايفني داقه عصافير ولا مختومه على قفايا الختم الصفيح يا عنيا شيلته من زمان

يزن قصدك ايه

قدر قصدي يا عنيا ان عربياتك يعني تبعك يعني عارفه انا بروح فين وباجي منين وبتعامل مع مين وهما يعرفو وانتا تعرف المكان وترجع تقولي بح امك في العش ولا طارت لا يا عنيا مهو ميبقاش ابني في حجري وارميه وارجع بعد كده ادور عليه

لينا بس ده كده اسلوب غلط يا قدر وانتي كده بتخوني وبكده مش هيكون في ثقه ما بين الطرفين

قدر لا يا حبيبتي انتم اللي بداتوا من الاول لما خونتوني وخلتوني مضيت وبصمت على ايصال الامانه ولا نسيتي لو نسيته ارجع افكركم ما عنديش اي مشكله وبعدين كل بيدور علي مصلحته اه مصلحته وعلي فكره ياحبيبي  مش متضرره انا ممكن اوصلك بالناس عادي ما عنديش اي مشكله بس قسما بالله يسكوك على قفاك لحد ما يحمر ويامر الرغيف ني

اتغيرت ملامح بيجاد للضيق والعصبيه وكان لسه هيتكلم لكن شاور له يزن

يزن بلاش جو تلقيح الكلام ده يا قدر احنا عايزين نساعدك ونوفر لك وقت ومجهود

قدر لا يا اخويا ما توفرليشلاني مشتكتش انا بعرف اصرف نفسي بمعرفتي فسيب حوار العربيات عليا وبعدين انا عايزه اقولك حاجه بسيطه يمكن تكون غايبه عنك انا كل حته  بجيبها بفرزها من اولها لاخرها من الاخر يعني بفليها من جوه لبره عشان بس اضمن ان ما فيهاش غلطه علشان شغلك

 يوصلك مظبوط بالمسطره لاني في السوق ومدعوكه فيه فعارفه اللعب من تحت لتحت والبضاعة المنقوضه اللي بتتحط وسط الشغل انتا بقى جاي وعامل ناصح عليا و مستخسر فيا رزقي في حين ان انا ما استكترتش عليك رزقك 

عارف ليه اان كلنا اسباب لبعض  بنرزق وبنسترزق من ورا بعض من اول العامل اللي شغال في المشغل اللي بيجيلك منه الشغل لصاحب المشغل حتى  العربيه اللي بتجيبلك البضاعه حتى  العبده لله وشاورت على نفسها  ليك وشاورت على بيجاد ويزن ولينا لمحلاتك للبياعين اللي واقفين فيها  كله بيسترزق من ورا بعضه دي تدابير مدبرها ربك واحنا مش اكتر من أسباب فيها

بيجاد طيب يا ستي ونعم بالله احنا ما اعترضناش المهم دلوقتي احنا عمالين نلف وندور في حلقه مفرغه من الاخر كده يعني حضرتك عايزه عربون كام 

قدر والله يا اخويا انت بتقول انك عايز الجديد فشوف انت دفعت كام عربون المره اللي فاتت وحط قده مرتين كمان داه اقله 

بيجاد بصدمه 9 مليون جنيه عربون بس ليه ان شاء الله 

قدر  والله داه اللي عندي مش عاجبك يفتح الله عايز تقنعني ان ال 3 مليون اللي انت حطيتهم وكمان مكسبي فيهم ما لمتش قدهم الطاق  عشره  عشان تبعتلي  قبل ما يعدي اسبوع على البضاعه اللي عندك وتطلب منها الطاق طاقين

بيجاد يعني ايه مش فاهم ممكن توضحي كلامك 

قدر يعني من الاخر كده  ومن ابو ناهيه انتا عارف ومتاكد ان اللي هتدفعه هيرجعلك قده مره واثنين وثلاثه واربعه و عشره كمان فمتعملش ناصح عليا وتقعد تفاصل وتستكتر عشان اصحاب المشاغل ما يستكتروش عليك ويعملولك شغل اي كلام من تحت بير السلم شغل  طلسق ملصق  زي ما بيقولو بالبلدي كده من الاخر انت عايز شغل صح  الصح يبقى تدفع فلوسه بما يرضي الله يعني لا تيجي عليا ولا اجي عليك لا تبخس بيا ولا بيهم علشان مترجعش وتقول جاااي

لينا معاكي حق يا قدر كلامك كله صح انا عن نفسي مقتنعه بيها سور يا بيجاد المره دي هي معاها الحق

بيجاد  يا جماعه انا مش معترض على السعر اطلاقا انا اعتراضي الوحيد على المبلغ مش اكتر

قدر برفعت حاجب والله يا اخويا انت المره اللي فاتت برده اعترضت على المبلغ انا نفسي استغربت المبلغ ولما نزلت ولفيت وعرفت ان السوق عايز المفتح والمدردح والاسعار كل يوم بتزيد عن اللي قبله 

بيجاد خلاص اوكي اوكي ماشي يا قدر  انا موافق على المبلغ كده تمام  اتفقنا ولا لسه في حاجه تاني 

قدر اه يا خويا اتفقنا اديني اسبوع ولما اخلص هبلغ لينا ولو خلصت قبل الاسبوع هتلاقيني بتصل  بيكم زي المره اللي فاتت  وهجيبلك البضاعه لحد عندك واديني عرفت العنوان  مايتوهش يعني

بيجاد اوكي اتفقنا

بيجاد فتح الدرج وطلع دفتر الشيكات وكتبلها الشيك وادهولها

لينا  هتحتاجيني معاكي المرادي كمان يا قدر ولا خلاص عرفتي الدنيا ماشيه ازاي 

قدر لا خلاص يا حبيبتي تسلمي انا عرفت الطريق هي كانت اول نوبه بس عشان افهم الدنيا ماشيه ازاي عشان مش بحب ادخل في حاجه جديده واعمل نفسي فيها ام العريف وفي الاخر يطلع بلح عشان كده قولتلك تيجي معايا لكن دلوقتي انا فهمت الدنيا ماشيه ازاي يلا بالاذن منك انا بقى يادوب اللحق وقتي عشان نشوف اللي ورانا 

مشيت  قدر بكل ثقه تحت انظار بجاد اللي مش قادر يفهم شخصيه البنت دي تركيبه عجيبه وغريبه بالنسبه ليه ممرتش عليه قبل كده 

 خرجت قدر من الشركه وركبت تاكسي لحد البنك خلصت ورجعت البيت  وهي محتاره تبلغ امها ازاي بغيابها المرادي كمان خصوصا انها هاتغيب اكتر بكتير من المره اللي فاتت حسمت امرها واتوكلت على الله وراحت لمريم اللي كانت قاعده في الصاله وسط اخواتها

قدر  بإبتسامه واسلوب كوميدي بقولك ايه يامريومه كنت عايزاكي في حاجه كده

مريم خير يا قدر الكويتين دول بتعمليهم لما تبقى عارفه اني مش هوافق في ايه في حاجه حصلت معاكي ولا ايه قولي دوغري يا بنتي اصل اللي ربا خير من اللي اشترا

قدر بضحكه طول عمرك فقساني يا مريوم طمني قلبك لا هو خير ان شاء الله الموضوع وما فيه ان انا لازم اسافر عشان عندي طلبيه شغل جديده

غزل بغل وحقد  اااااه قولي بقى كده رجلك خدت على الروح والجاي ما انتي ليكي حق  يا اختي لا حسيب ولا رقيب وعامله علينا بس انك الكبيره وبتحاسبي فينا في الرايحه والجايه وناقص كمان تحاسبينا على النفس اللي خارج وداخل فينا 

قدر  بحده لا يا حيله امك انا مش رايحه اتفسح ولاانيش يا اختي  رايحه اشم هوا انا بروح بيطلع ميتين امي في الشغل عشان خاطر بس اعرف اكفي البيت غير احتياجاتك واحتياجات اختك والحمد لله ربنا رحمني من اللف في الشوارع و اشتغلت في شركه  كويسه اترحمت بيها من المناهده مع الناس اللي تسوى واللي ما تسواش عشان خاطر بس اعرف اجمعلك كام جنيه انما يا اختي ده شغل عيشك في مكان اوبها زي اللي بقيتي بتتمنظري بيه فانا لو قلت لا هايقولولي بالسلامه مش هيسموا عليا  ومش بالسلامه بس لاء داه طريق السلامه والقلب داعيلك ولو داه حصل هنرجع تاني شقه الطالبيه  مهما اللي عاكييني الشقه دي لو نسيتي  فحطي عقلك في راسك تعرفي خلاصك

مريم  سيبك منها يا حبيبتي وقوليلي انت هتغيبي قد ايه  المرادي 

قدر والله يا ماما لسه مش عارفه الشغل في الشركه ما فيهوش مواعيد انا المفروض دلوقتي اروح عشان استلم بضاعه تبع الشركه ولازم اقف عليها لحد ما اجيبها وارجع اسلمها في المخازن

غزل بخبث انما يا قدر صحيح ما قلتليش ايه اسم الشركه اللي انت بتشتغلي فيها دي

قدر ببرود وانتي يا روح امك يخصك في ايه انتي كنتي طول الوقت بتقولي عايزه وعايزه وعايزه واديكي اهو يا اختي بقيتي زيك زي اولاد الزوات بتلبسي من الغالي وبتاكلي من الغالي وبتاكلي اللحمه اللي كنت واكله دماغي بيها كل يوم 

غزل بعصبيه قصدك ايه  يا ست قدر انت بتعايريني ولا قصدك تذليني يعني باللقمه االي بطفحها

قدر لا يا اختي  لا بذل ولا بعاير انا بس من الاخر كده بفكرك ان شغلي داه هو اللي بيصرف علينا كلنا فمعنظيش استعداد اخسره و انتي عمرك ما هتتغيري ولا هتشبعي ولا هتستكفي ما هايملاش عينك غير شويه تراب في قبرك وابقي افتكري كلامي ده وخليه حلقه في ودنك عشان هاتحتاجيه بعدين 

وبصت قدر لامها وكملت كلامها ومعبرتش غزل تاني

قدر طب يا ماما انا بلغتك اهو و هقوم عشان اجهز نفسي عشان باذن الله بكره الصبح بدري اتوكل على الله انا داخله اوضتي يلا تصبحي على خير 

دخلت قدر اوضتها تحت انظار غزل اللي عماله بتبصلها بكل حقد وغل 

  قدر في اوضتها بتتصل باصحاب المشاغل اللي اشتغلت معاهم اول مره اتفقت معاهم على الطلبيات وكمياتها 

وبعد ما قفلت وخلصت معاهم خبطت بإيدها على راسها يا الله دانا نسيت مشكله العربيات خالص وراحت عن بالي طيب والحل ايه دلوقتي ثواني و مسكت الموبايل واتصلت على هم حسين

قدر السلام عليكم اخبارك ايه ياعم حسين

عم حسين وعليكم السلام  الحمد لله بخير يا بنتي طمنيني  اخبارك ايه

قدر الحمد لله يا عم حسين في  زحام  من النعم والله المهم انا كنت عايزاك تساعدني في موضوع العربيات كده العرييه بتاعتك مش مكفيه انا عايزه عربيتين ثلاثه كمان وكمان يكونوا  كبار يعني ياريت لو نص نقل مش ربع نقل المرادي 

هم حسين بحيره والله يا بنتي مش عارف 

قدر يا عم حسين دورها في دماغك كده ان شاء الله هتلاقيلها  حل اكيد مهو مينفعش نقف محلك سر

عمحسين طيب بصي اديني كده يوم او اثنين وانا هحاول ادبرها لك باذن الله 

قدر لا مش هينفع مافيش عندي وقت خال داه ربك عالم انا هتنطط من بلد لبلد ازاي فبالله عليك حاول ان انتا تتصرف وتحلها انهارده ضروري علشان هاتحرك بكره الصبح

عم حسين طيب يا بنتي اديني ساعه زمن بس هاتصل  بالسواق اللي بنتعامل معاه اكيد يعرف ناس ثقه ويقدر يفيدنا اكتر في الموضوع داه 

قدر تمام ماشي بس المهم يا عم حسين يكونوا ناس امنيه وثقه ومفتحين انا فاهم قصدي

عم حسين فاهم  يا بنتي ما تقلقيش انتي عارفه كويس الناس اللي انا بتعامل معاهم

 قدر خلاص تمام ماشي يا عم حسين رد عليا بسرعه بس علشان اعرف انا هاعمل ايه 

مر الوقت واخيرا قدر نامت بعد ما اطمنت على كل حاجه

وتاني يوم صحيت قدر  جهزت نفسها وخرجت من البيت وراحت عند  عند عم حسين لقيت العربيات مستنينها  ركبت العربية بتاع عم حسين والباقي اتحركوا وراها 

وفي الشقه  استغلت غزل عدم وجود قدر في البيت ودخلت تتسحب على طراطيف صوابعها اوضته امها استغلت غياب الكل وبدات تفتش فيها بحرص وحذر  لكن ما قدرتش توصل لاي حاجه بسبب حرص قدر  اللي اتعمدت اخفي اي حاجه خاصه بشغلها وفلوسها تماما عن ايدي غزل او اي حد في البيت ككل

غزل بنفخه وغيظ اوف بقى هي البنت دي الواحد ما يعرفش ياخد معاها لا حق ولا باطل وبعدين بقى 

خرجت وهي بتتسحب من الاوضه ودخلت اوضتها غزل ما بينها وبين نفسها البنت دي وراها سر كبير وبحورها غويطه دي اكيد شغاله في شركه من بتوع رجال الاعمال التقال في البلد وكملت بحقد يا ريتني انا كنت مكانها على الاقل كنت عرفت اوقع صاحب الشركه واجيب رجله مش الهبله بتاع المثل العليا اللي عايشه في جو لا يوكل ولا يشرب في الزمن داه

 

قدر قضت اسبوع كامل وهي بتحاول تجمع الطلبيات وبتتصل بامها كل ما وقتها يسمح 

وكانت غزل بتحاول تستغل عدم وجود قدر وطول الوقت تطلب طلبات مبالغ فيها بطريقه غير طبيعيه

مريم  بزعيق يا بت بس بقى بقول لك ايه يا بت انتي انزلي من على دماغي وحلي عني هو انتي كل ما تحطي وشك في وشك تقولي هاتي وعايزه ايه ما بتشبعيش طلبات

غزل في ايه ياما ما هو ربنا فتحها علينا اهو ليه بقى بتنشفيها عليا لما اقولك ان انا عايزه حاجه هو ايه أصله داه

 مريم انتي ما فيش حاجه اصلا بتملي عينك غير التراب غوري يا بنت ذاكرلك كلمتين ينفعوك ما هو مش حوار كل يوم اللي طهقت منه عايزه فلوس عايزه فلوس وياريت بتستكفي لا دانتي بتزيدي فيها  اجيب لك منين انا ها

غزل تجيبيها من مغاره علي بابا اللي فتحت ابوابها لبنتك 

مريم مغاره ايه يا موكوسه ده اللي جاي على قد اللي رايح واختك طالع عينيها عشان تكفي على طلباتك وطلبات البيت ولو فضلتي على الوضع ده احنا كده مش هنعرف نكفيك انت بس مش مش نكفي نفسنا كمان معاكي

غزل ما ليش فيه مش قد مصاريفي كنتوا خلفتوني ليه من الاول علشان اتبهدل واتمرمط معاكم واتدفن في الفقر داه

مريم طب اتلمي لالمك ولا تحبي اقول لقدر لما تيجي وهي تتصرف معاكي

غزل بقلبة وش هو انتي محسساني ليه ان بنتك معلقالي الفلكه ومستنيانا بيها

مريم لا دانا اللي هعلقلك الشبشب يا بنت الرفضي

 غزل طيب اما نشوف اخرتها معاكم  ايه لحسن الواحد قرف من دي عيشه على فكره انا نازله مع اصحابي

مريم اصحابك ايه دول  يا ام أصحاب اللي طلعتيلي بيهم  في النقدر جديد اتلميتي عليهم من انهي داهيه دول وبعدين تعالي هنا يابت انتي جالك عمى ولا اتطسيتي في نواضرك مش شايفه  الساعه كام دي داخله على عشره بالليل هاتنزلي أمته وتيجي أمته يا بت ها انتي نظامك ايه بالظبط ماشيه معاكي زي الشريك المخالف نقول يمين تقولي شمال نقول شمال تقولي شرق اتعدلت لاعدلك  والا ويمين الله مش هتبقى الفلكه هسحب ايد المقشه من جوه وهكسرها فوق جسمك عضمايه عضمايه هو باين كده يا غزل ان انا دلعتك لما عيارك فلت اوعي تكوني فاكره يا بت ان انا هسيبلك السايب في السايب وتقولي امي كبرت وعجزت فانا اعمل اللي في دماغي وامشي على حل شعري تبقى غلطانه يا قلب امك ده انا عظيم بيمين فيا قدر كفايه اقعدك على كرسي بعجل واقعد اتفرج عليك ولاني استناك وتجيبيلي العار وتحطي راسي وراس اخواتك في الطين وخروج يا غزل ما فيش ودروسك يا غزل انا هخلي اختك لما ترجع تجيب لي ارقام المدرسين بتوعك ومواعيدهم والدرس يخلص الساعه كام ولو اتاخرتي عن مسافه السكه لصبحك بعلقه وامسيكي بعلقه وغديكي بعلقه واعشك بعلقه عشان انت شكلك كده وحشك ضرب زمان انت طول عمرك عامله زي الفرع العوج ما كنتيش بتمشي الا بالدق على دماغك

دخلت غزل اوضتها وهي بتدبدب في الارض برجليها وعماله تبرطم

فتون بالراحه عليها شويه يا ماما

مريم بلا براحه بلا زفت اختك يا بنتي عينيها بقت فارغه وما يملاش عينيها غير التراب ايام الفقر تقولك عايزه ومش مقدره وكنت بقول معلش ودلوقتي لما ربنا فرجها بقت عايزه الاكثر بقت زي السعرانه بس الكلب السعران ديته رصاصه بس اختك مش هتتسعر على الناس اللي بره اختك اتصعرت علينا جوه

فتون طيب يا ماما بالراحه وحده وحده ما ينفعش انك تعامليها كده طول الوقت

مريم ربنا يكملك بعقلك يا حبيبتي يا ريتها كانت خدت حكمتك وعقلك يا بنتي وتفكيرك انتي ولا اختك بس دي عامله زي النبته الشيطاني اللي واخده دم ابوكم دم وسخ وفاسد واخده اخلاقه الزباله واخده طبع ابوها ما كانش يملا عينه غير التراب كان ياكل ويقول لك جعان انا ده مكفنيش انا عايز وعايز وعايز ما كانش بيستكفى ولا بيستوفى من اللي في ايده وكان دايما عينو على اللي في ايد غيره 

فتون هنقول اي يا ماما ربنا يهديها ويصلح لها حالها

 قدر كانت بتلف على المحلات والورش  سافرت اسوان وهناك شافت خالتها

قدر خالتي ازيك عامله ايه طمنيني عليك يا حبيبتي وحشاني والله دايما في بالي

منى:  الحمد لله بخير يا حبيبتي انت عامله ايه طمنيني عليك فين امك واخواتك مش موجودين معاكي ليه بقى الواطيه تيجي اسوان ومتعديش تقول اشوف اختى مكانش العشم

قدر لا والله يا خالتي انا جايه لوحدي عشان جايه اجيب شغل

منى: برده يا بنتي لسه بتشتغلي نفس الشغلانه اللي طالع عينك فيها دي كان عليكي بإيه يا بنتي الغلب داه كله

قدر لا يا خالتي الحمد لله ربنا فرجها عليا وربنا كرمني واشتغلت في شركه واديني جايه عشان اجيبلهم بضاعه وبوردهالهم وبيطلع لي منها حسنه سترتنا وريتني من لف الشوارع

منى: ربنا يفتحلك يا بنتي ابواب الخير ويوسعها عليكي كمان وكمان انتي تعبتي كثير وامك تعبت والشيله كانت تقيله عليها وهي بطولها

قدر الحمد لله يا خالتي ادعيلي بس ربنا يكرمني 

منى: دعيالك يا ضنايا من كل قلبي ربنا يكرمك يا حبيبتي ويوسع عليكي يا رب

وبليل استغلت غزل نوم امها واختها ولبست وظبطت نفسها وخرجت وهي بتتسحب ونزلت من غير علم حد

 عدت كام ساعه وصحيت مريم عشان تتوضا وتصلي القيام

اتوضت  وهي خارجه من الحمام طالعه على الصاله لقيت باب البيت بيتفتح ودخلت منه غزل  وهي بتتسحب جريت عليها مريم بصدمه وجابتها من شعرها ونزلت فيها ضرب

دخلت قدر ولقت امها منيمه غزل على الارض وقاعده فوقيها و نازله فيها ضرب

 حاولت قدر تسلكهم بس ما قدرتش

قدر مالك يا ماما في ايه ونازله في البت ضرب كده ليه ايه اللي حصل حد يفهمني

وبعد معاناه كانت قدرت تسحبتها من فوق غزل

قدر يا امي في ايه فهميني بالله عليكي منا مغيبش كام يوم واجي والاقي المصايب مستنياني 

مريم  بزعيق وهي بتعافر علشان تطول غزل سيبيني عليها يا قدر ما تحاميلهاش  بنت الجزمه دي دي بت عايزه تربيه من اول وجديد وقطم رقبتها

قدر يا ماما فهميني بقى في انا عملت ايه حد يقولي بدل منا  عامله زي الاطرش في الزفه 

مريم الفلتانه كل يوم تقولي ان هي عايزه تطلع ياربت بالنهار كنت قولت وماله بتفك عن نفسها انما دي عايزه تطلع انصاص الليالي عشان تقابل صحابها والنهارده سهتنب وانا نايمه

 وخرجت ولسه جايه لي دلوقتي اختك جايه لي الساعه اتنين ونص وداخله على على تلاته الفجر  كانت فين ده كله ها لسه بردوا بتحاميلها

قدر بصدمه ايه بتقولي ايه يا ماما

مريم زي ما بقولك كده سيبيني عليها

 قدر  سابت امها ووجهت كلامها لغزل اللي بتبصلهم بكره 

قدر كنتي فين يابت انطقي احسن ما اولع فيكي وماهيرفليش جفن 

غزل كنت مع اصحابي فيها ايه يعني كفرت ولا كفرت

قدر اه كفرتي لما تطلعي في انصاص الليالي تبقى كفرتي اللي بيمشوا في انصاص الليالي دول اذا ما كانتش واحده مع جوزها ولا واحده طالعه لمصلحه غصب عنها غير كده بيكونوا بنات ليل اللي بيقفوا على النواصي ويا ترى كنت مع اصحابك  في انهي مكان يا محترمه يا بنت المحترمين اوعي يا بنت تكوني فاكره عيشه المناطق الراقيه انك هتكوني منهم يا بت ده انت تربيه الطالبيه اوعي تنسي داه فاهمه

يتبع 

رواية انتقام القدر الفصل السادس 6