رواية معا نحو الجنه (كاملة جميع الفصول) بقلم منه سلطان
_إمام الجامع طالب ايدك.
_إيه؟؟
إيه الصدمة دي هو في الغالب المفروض الموضوع بييجي واحدة واحدة لكن متبقاش امي لو مختلفتش عن الكُل.
ردي البديهي وملامحي المصدومة والمذعورة في نفس الوقت معجبتهاش فردت بضيق وقالت ببساطة:
_زي ما سمعتي كده، ويدوب تلحقي تجهزي عشان طلب من أبوكي أنه يتقدملك النهاردة بعد صلاة المغرب.
كنت لسة في حالة صدمة وببصلها بعدم فهم ولما خلصت رجعت أسألها:
_أنتِ بتتكلمي بجد ولا بتهزري معايا؟!
ردت بغضب:
_ايه بهزر معاكي دي، زي ما سمعتي كده امام الجامع طالب ايدك وهييجي عشان الرؤية الشرعية النهاردة بعد المغرب.
_بس ده….
سكتّ لثواني قبل ما أبصلها وأنا على تكة وأعيط:
_ده بيلبس الجلبية قصيرة يا ماما؟!
ردت بنفس طريقتها الباردة:
_والله راجل محترم وبيمشي على السُنة.
رمشت بعيني بعدم تصديق وبعدين علقت على كلامها بصدمة:
_ده مربي دقنه يا ماما!
ضربت كفوف ايديها ببعضها وردت:
_ده بدل ما تفرحي أنه راجل مُلتحي وعارف ربنا، واحدة غيرك يا بت كانت قامت تصلي ركعة شكر لله أنه رزقها بعريس مُلتحي .
غمضت عيني بإمتعاض وأنا بشاورلها وبقول:
_متقوليش عريسي بس عشان ميحصليش حاجة.