وضع الشاب الكاميرا بحقيبتها الخاصة وهو يجمع بعض متعلقاته مرددًا بابتسامة واسعة :
-العفو.. حضرتك كنت متعاون جدًا.. مجرد ما هخلص الصور هبعتلك نسخة واتس آب.أماءَ له “أمجد” برأسه التي استقرت وجهتها نحو “داليدا” والتي رمقها بنظرة مبتسمة مرددًا :
– تمام.
ونظف حلقه بلسانه وهو يُطلق تنهيدة عميقة قبل أن يتجه نحوها محررًا ابتسامة ماكرة. أما هي فكانت تلهو بجوالها عندما توقف أمامها مباشرة لترفع أنظارها نحوه بابتسامة خفيفة مرددة وهي تنهض من مقعدها :
– أهلًا بيك يا أستاذ “أمجد”.. بكرر اعتذاري تاني لانفعالي المرة اللي فاتت، بس أوعدك إنها مش هتتكرر وهعمل إنترڨيو محترم.. أستأذن حضرتك تقعد بس ربع ساعة.
رفع “أمجد” يُمناه أمام وجهه يخطف نظرة سريعة علي ساعة يده مرددًا بجدية :
– للأسف ده ميعاد القهوة بتاعي ولو فوته بأريف طول اليوم.
هزت “داليدا” رأسها خفيفًا وهي تردد بهدوء :
-ممكن حضرتك تطلب القهوة تجيلك هنا، أو تأجل ميعادها بس ربع ساعة.
خطى “أمجد” نحو الخارج بلا مبالاة مرددًا بثبات :
– للأسف على ما توصل هنا هتكون بردت، وأنا مبحبهاش باردة، وبعدين الكافية قريب من هنا.. خمس دقايق بالعربية.
هرولت خلفه تتبع خطاه بصدمة تعتلي معالمها وهي تردد بحنق شديد :
– بس حضرتك اللي حددت الميعاد ده.