رواية عشق الثأر الفصل السادس 6 بقلم مينة طلال – للقراءة المباشرة والتحميل pdf

مُروج:

– الدنيا مو دائما عادلة وتجي مثل ما نريد !

اكو هواي اشياء ننولد واحنا مامختاريها..

اهلنا ، حياتنا، ولادتنا، موتنا، وغيرها من الامور..

يومية تكعد الصبح تتمنى انو تكون مامولد مو هنا عايش

مو بهذا المكان ، مو ويا هذول الناس

بس الوقع انت هنا! حياتك هنا لازم تبقى هنا ..

تشرد للنوم تكعد لنفس الواقع يومية، تفتح عيونك وتتمنى مافاتحهن وماكاعد هل يوم ..

اول ماتفتح عيونك ،تلكة روحك تعيش نفس البارحة ماكو تغير ..

قاسم: عائشة شوفي مُروج كعدت، خل تنزل تتريك وياي..

عائشة: حاضر استاذ..

صعدت عائشة على الدج الفخم ،داخل القصر

بطراز بغدادي قديم وكلاسك ،وصلت لغرفة مُروج

دكت الباب تطلب اذن الدخول..

عائشة: ست مُروج ممكن ادخل؟

انتضرت يجيها الرد بس مجاوبت ،فكرت انو هية نايمة دخلت لغرفتها وتشوفها كاعدة كدام مرايتها، تمشط شعرها الاسود الفاحم بهدوء حتى ما التفتت عليها..

عائشة : ست انتي كاعدة، ليش مجاوبتيني؟

مُروج : نعم عائشة؟

_ أستاذ قاسم طلب مني اناديج للفطور..

_ مااشتهي، شكراً الج والة..

نزلت عائشة من الدرج متوترة ، خايفة تنطي جواب الأنسة مُروج

لعمها لان تعرف منو الي كدامها وشنو ممكن يسوي..

قاسم: ها عائشة وينها؟

عائشة: استاذ شوية مريضة، ومو حابة تفطر

احطلك الفطور تاكل وهية تاكل بعدك!؟

قاسم: مااشتهي اكل وهية مو كدامي

مو مشكلة اني اصعدلها..

نصدمت عائشة من برودة الاستاذ وجاوبة

وكف عدل ملابسة واتجاه للدرج ، يصعد بخطوات واثقة وموزونة

وصل لغرفتها دك الباب وهية مجانت متوقع هوة..

مُروج : عائشة روحــي كولي لاستاذج ، ماتريد

ماااريد اسمم..

قاسم: اسم الله عليج ياروحي

ليش هيج تحجين شبيج؟

احد مضوجج؟

مُروج: عمو شجابك !

اقصد ليش صعدت

_ صارلج فترة ماتنزلين للاكل ، واني ماعدي غيرج

اذا مااكلتي اني مااشتهي الاكل..

_ مالي نفس عمي

تقرب بأتجاها مد ايدة لوجهه

غمضت بخوف، مثل الشخص الي واكف كدام الجلاد

جسمها كلة يرتعش خوف ،مسح على خدها وكال:

_ براحتج..

عافها بهدوء نزل من الدرج للباب وطلع خارج القصر..

السيد قاسم وحيد من سنين خاصتاً بعد اخر حادث صار..

جان مزوج أمراة جداً جميلة ، جانت حامل بشهرها الخامس وبعد السونر عرفو ولد ، سوو حفلة عزمو

كل كبار شخصيات بغداد ، جانو مثل روميو وجوليت …

حبها قاسم بشكل مو طبيعي ، لدرجة كل النساء جان يكولون ساحرتة ، استاذ قاسم من يكعد من النوم

لحد مينام هوا مكابلها ، كلشي تطلب جان يكول تم ..

لحد ما يوم من الايام سافر استاذ قاسم للنرويج بدفعة للدراسة

جان الست مُروج ثاني ابتدائي ..

جنت انظف القبو بطللب من ست ريم زوجتة

اسمع ضحتها الشهيرة الي يسميها هوة ضحكة الدعارة

جانت تضحك بهستيرية وانا جنت عايفتها وحدها فوك ويامن تضحك؟ بس اني مجرد خادمة هنا!

لا الي حق اسال ولا اعرف شي ، غير الي همة حابين اعرفة

سمعت صوتها هدء وبعد اقل الساعة ، سمعت استاذ قاسم

ينادي باسمي واسمها

اني وجاي اطلع من القبو حتى استقبلة ، لان مجان مطينا خبر يجي اليوم يمكن حب يفاجئ زوجتة..

وانصدم برجال عاري تماما يدور مكان يشرد ، تطلع ورا ست ريم بروب النوم فقط تلتفت حاول يدفعني وينزل للقبو ، لكن بثواني صار استاذ قاسم يمنا..

جانت صدمتي بهذا الرجل العاري

اني اصرخ واغمض عيوني من بشاعة المنظر، لا شيء

من صدمة قاسم الي جمد بمكانة ، حتى ما رمش..

ريم حجت هواي حجي بس لا اني ولا قاسم نسمع شي

اني مغمضة وافتح عيني باتجاه الاستاذ ، الي ماتحرك للحظة حسبت راح ينجلط ويموت..

نزلت مُروج بفستانها الابيض الملكي ، جان يوم ميلادها وبعد ساعات يدخلون اهلها حتى يحتفلون بيها ، لان جانو بسفر وليوم يجون

جان اهلها كثيرين السفر دراسة وعمل ولان استاذ قاسم متعلق بيها

وهية متعلقة بي جانو دائما يخلونها يمنا..

بس تقربت وشافت الرجال مغطي عورتة بيدة وجسمة يرجف وريم تبجي وتصرخ وتحجي ، حتى كالت هذا صاحبي بس منظرهم مبين شما تحجي وتجذب مجانت تكدر تنقذ روحها

صرخت مُروج وفززت استاذ قاسم من صدمتة..

قاسم: عائشة اخذي مُروج واذا صار يوم القيامة ماتنزلين مفهوم؟؟؟؟

_ استاذ بس استهدي بالرحمن هسه نفهم منها وووو…

قاسم: اخذي الطفلة عائشةةةةة

صرخ بيه صوت من خوفي والسلاح بخصرة حاط ايدة علية ..

غمضت عيون مُروج التبجي وتصرخ خافت من الرجال، ركضت لغرفتهم فوك قفلتها وكعدت..

اسمع صياح قاسم وهوة يكرر كلمة :ليش بس فهميني ليشششش سبب واحد مقنع اطيني؟ بس واحد بشنو قصرت شنو طلبتي ومانفذتة شنو الي تمنيتي وما سويتة

احجيييي احجي لاتبجين فهميني ليششش..

اسمع عتابة ودموعي تنزل صدك مايستحق هيج يصير بي ، كلشي جان موفرلها وعلى طلب لسانها..

اسمعها تبجي وتتوسل بي تحجي او الاصح تجذب جذبة عبالها تنقذ روحها مثل كل موقف..

ريم: حبيبي ولله مو مثل ما تتخيل ، خل افهمك بس اطيني فرضة اشرحلك قاسم حبيبي..

_ أتفهميني مو فهميني بجهنم!اشاهدي ريم..

وثواني وصوت الطلق اخترق مسامعنا ٦ طلقات مُتتالية جنت عارفة هاي النتيجة بس ماتوقعت يسويها الاستاذ ، خاصتاً هوة برافيسور جامعي وعندة شهادات عُليا ومثقف وواعي جداً ، بس يمكن صدمتة بحب حياتة الجان المفروض تصير ام ابنة فقدته عقلة..

مُروج ضلت تبجي بشكل هستيري حاولت اهديها ماهدئت لحد ما تقيئت وتخربطت بيدي ، من خوفي لاتموت بيدي ركضت شايلتها ونزلت اركض متعديتهم..

وكفت كدامهم وايدي رتخت واني اشوف قاسم جان واكف كدام الجثث والدم تارس الارض والفراش ومطشر على الحايط..

جانن ٣ طلقات براسهم وصدرهم ومناطقهم الحساسة واثنينهم ميتين

بسبب المكان الراقي العايشين بي اسمع الناس برة صوتهم قريب وسيارة الاسعاف والهوسة ، قاسم شاف منظر مُروج وكع راكع وكع المسدس من ايده ولزم راسه يفركة حيل ..

ضل يصرخ ويبجي كلبي تكطع على منظرة، منو جان يتخيل هيج انسان نظيف وشريف تعبان على نفسة يصير قاتل بسبب انسانة قذرة خانت العشرة ومشت بالحرام ، حتى ترضي غاياتها الشهواني القذرة..

دخلو اهل مُروج علينا..

ركض جميل علية ساحب بنتة من ايدي وست ليلى امها صرخت مذعورة من خوفها بسبب الجثث ومنظر بتها ، اخذو بتهم وطلعو ركضت تاركين استاذ قاسم بحطامة ، عين علية وعين عليهم همس بصوت مبحوح..

_عائشة بشنو قصرت؟ ليش صار وياي هيج؟ ليش

اريد سبب واحد بس بسبب شخص يقنعني ، اريد كلبي تطفى نار قتلتهم واحس النار شاعلة بكلبي بعدها مجاي تطفى ..

_ استاذ انظف المكان ونشمر السلاح ، ارجع سافر انت نكول حرامي دخل اي شي ، المهم انت تطلع منها .. انت ما تستاهل تنسجن بسبب هذول القذرين ..

جنت احاول اساعدة هوة هز راسه برفض

دقايق والشرطة حاوطو البيت طبو مجموعة رافعين اسلحتهم بأتجاهنا ركضو ثنين كعدوني على ركبي مثل قاسم ، وحطو كلبشات بيدنا

باوعت لقاسم نظرة متوسلة: أستاذ انكر كلشي!..

مُروج: اي ست عائشة هنيالة الماخذ بالج..

عائشة : انتهى عهدي من زمان اميرتي ، دورج الدنيا دنيتج والزمن زمنج ، حبي وعيشي وشوفي الدنيا ..

_ وين اعيش يم قاسم ؟ هاي شبيج عائشة

_ انتي ليش تكرهين عمج ، رغم شوفي شـَڪد يحبج وحريص عليج من الهوة يخاف عليج

_ هه، عائشة اكو سر بكلبي اكدر أمنج بي

_ أمني ، اعتبري روحج ماحجيتي اصلان، كولي شنو

_ قاسم هوة قتل اهلي ..

صفنت بوجها صوتها يرن بااذاني هية وتكول قاسم كتل اهلي ، اني اذكر هذاك اليوم بتفصيل ، ما مر يوم علية مااذكرت هذيج الايام..

اذكر من سحبونا من البيت ، الاسعاف طبو مغطين الجثث وسحبونا الشرطة اني ويا..

صعدونا السيارة واخذونا للمركز ، اول مرة ادخل مركز بعمري ، شرطة بكل مكان اجهزة بخصرهم يصدر منها صوت فجأة يجفلك ، وجهم متعوبة وتخوف المكان ظلمة ويقمت الروح ، حتى لو واحد ممسوي شي هاي الاجواء تجبرك تصدك انت مجرم!

كل واحد حققو ويا منفرد

عائشة: حضرة الضابط هذا الي صار حجيتله كلشي وكلتله

استاذ قاسم بريئ زوجتة خانتة بغيابة وبيتة ، هوة ممقصر عليها بشي.. وهوة فقد صيطرتة وقتلهم، بس يستاهلون ، لو شفت المنضر الي اني شفتة جان انت قاتلتهم ، سيدي الرجال طلع بدون ملابس وو.. استغفرالله سيدي مااكدر اشرحلك بشاعة المنظر ، يعني استاذ قاسم طاب يفاجىء المراة الي جانت تزني بيتة بنفس اللحظة…

تتخيل صعوبة موقفهم؟

الضابط: انتي ليش ادافعين الة ، ممكن تكونين شريكة بجريمتة اذن؟

_ سيدي المنظر الي شفتو دليل فعلتهم ، اذا عني فلحمي من قاسم

أواني وشغلني وعشت اني وعائلتي بخيرة

ومو ابن حلال الي ينكر المعرف

اني حجيتلك الي عدي ، وهذا الي صار

الضابط: جانت طفلة وياكم وطبو ناس اخذوها

منو هاي وليش اخذوها بهل وقت تحديداً وين راحو

_ استاذ هاي بنت اخو اهلها مسافرين وليوم عيد ميلادها

بس طبو يفاجوئها لكو هذا المنظر وجانت متخربطة بيدي من الخوف…

ابوها اخذها من ايدي وركض يمكن راح لمستشفى قريبة تكدر ادور عليهم..

_ راح نسوي الإجراءات الازمة بس اليوم راح تباتين بسجن

عائشة : واستاذ قاسم؟

_ حتى لو القصة حقيقية وهيه زنة ، اقل شي ياخذ حكم ٥ ال ٧ سنوات…

_ ولله حرام شبابة يروح بسجن ، هوة رجال مرتب وتعبان على نفسة..

_ الضاهر الاستاذ مالتج تارس عيونج..

جندي: سيدي حادث سير قريب من منطقة القتل عائلة مكلوبة بيهم السيارة الاب والام ميتين بس الطفلة فاقد اللوعي

شهكت الطم على وجهي : سيدي يممَڪٰن همة سيدي ، يمة بنيتي مروج..

_ هدوء ، اخذها واني اروح اشوف الموضوع..

فزيت من حاجتني..

مُروج: ها عائشة وعدتيني ماتحجين! ليش ساكتة شبيج؟

عائشة: انتي منو وصلج هل كلام؟؟؟

_______________

أسحاق..

طلعنا اني ومروج سقت بسرعة وكفت يم مضمد، قريب شاف ضغطها وضعها حطلها مغذي مالح ضلينا ساعة وطلعنا …

اخذتها لمطعم دائما نجي بليل اني والولد ،كعدنا بااطلالة تصير قريبة على نهر دجلة والمصرف ،جان الجو بي نسمة برودة والشمس طالعة باوعتلي مبتسمة وكالت:

_ شناقصنا ونعيش هل عيشة بالحلال؟

أسحاق: حاولت هواي ابتعذ وكل مااروح ، الكة روحي بنص هل شغل اكثر

_ يعني راح تبقى طول عمرك تشتغل هل شغل؟

باوعتلي بنظرة توسل كأنو عيونها يطلبن ارفض الجواب الي بالها واريح كلبها جاوبت بتردد: ان شاء الله لا صدكيني اني حاي احاول ما أذي احد حتى البضاعة جاي نتلفها ونبيعها يـعني الي ياخذها مايتأذا

جاي احاول ابررلها وابرد كلبها قاطعنا الكابتن وهوة يسلم : استاذ شنو طلبكم

بس رفعت وجهي ركز بملامحي وكال : الساحق؟

شرفت استاذ شرف الي اشوفك بالنهار استاذ نورت ولله ..

_ اخوي انت ، طلبي مثل كل مرة وكهوة سادة

دموع: مااحبها آس..

_ نور بـﻋـَدين عيني ، هاهيه خوية مشكور

بس راح سحبتها قريب اهمس : انسي اسم اسحاق دموع تعودي تصيحيلي ايوب ، احنا متخفين بااسمائنا ما نريد احد يعرف هويتنا او اي شي عنا ، اصلان اكبر غلط جبتج وياي هنا، هسه عرفو انتي تخصيني شهل مصيبة ..

_ شمدريني اسحاق ، اهووو ايوب يمعود وين اعرف ادبرها ونبي ابعرها، شسوي هسه اخ راسي..

_ ركزي بالمنظر الجميل وابدعيني بسكوتج لاتحجين ابد خاصتاً اذا شخص غريب يمنا

_ اووو ، على سالفة الغريب تعرف من شفت بجامعتي قبل يومين وكل مااريد اكلك انسى..

باوعتلها بااستغراب : منو؟

_ ابن عمو قادر يٰس ضل يسولف ومدري شنو ، بس اني مااطيتة مجال ولله ، كلتله انت ماتقبل نحاجيهم..

_ زين سويتي ترة هذول كلهم مو مستواج ، بعد اذا تشوفي يمنة روحــي يسرة..

_ بس اسحاق اخو بقسمي ودائما الكة بوجهي بساحة ويجي يحجي وياي ، كلت اكلك احسن ما تسمع من غيري وتضوج، اهم شي عدي انت مايهمني اي بشر انت كلشي الي..

_ فدوة اروحلج ، بنيتي واخيتي ، كلبي انتي بنيتي هاي الدنيا كلهم ذيابة لاتشوفي لابس ذيج الهدوم وحاط ذاك العطر لو تفوتين بعقلة تشوفين مصايب..

لاتهتمين لبشر اني يمج سندج وظهرج واي شي تريدي اسوي الج ..

_ اريدك سالم حبيبي..

جاي نحجي اجو حطو الكيك كدامنا والكهوة وراحو قدمت الاكل كدامها باوعتله بعدم رغبة كتلها: ها حبيبتي

_ مااحب الكهوة السادة مو تعرفني؟

_ لخاطري حبيبتي حتى راسج يستعدل ، دموع بداعة ابوي وجدي غرفتي لاتفوتيها بعد .. جنتي ماتوصلين لباب شجاج ما تكوليلي

_ وعد مااوصل بعد

_ اكلي يروحي

اكلنا وضلينا نسولف وكساع تشرب شوية وتعبش وجهه واني اضحك عليها ، خلصنا دفعت الحساب ورحنا للسوك اشتريتلها من كلشي قطعة حتى لاتشك عمتي ، وصلنا لمطعم احذت دجاج ورجعنا للبيت ..

طبكت السيارة نهاية الفرع وغطيتها قفلتها ،اشاركنا اني ودموع نشيل الغراض خليتها تشيل الاكل واني ملابسها، اول مرة اشوفها هيج فرحانة عرفت اني مقصر وياها، وعدت روحي اخصص يوم كل فترة اطلعها …

طبيت مبتسمة وفرحنا سديت لباب الخارجي وطيبنا مااشوف عمامي مجمعين يم عمتي ، هيه بالكاع واكعة وتبجي اخذتني الغيرة عليها شلون بنصهم بالكاع تنحب وظهرها محني ، شمرنا الغراض بالكاع وركضت ارفعها..

_ شبيج عمة منو وياج ، خير العائلة السعيدة متجمعة ليوم يمي سامعين شي؟

غايب: عمي انت مو صغير ، هذا البيت مال ابوك بي حصة من امي وابوي يعني احنا النة قسم منة

كفاح: هذا حصتي اكلتو كلشي واجيتو علينا ، جلاب الله لا يوفقكم..

تقدم عمي يريد يضربها خليتها بظهري ودفعته : وحق اللله ، الي يوصل يمها ويرفع ايدة بوجها احسب الله ماخلقة ،والي ماسويتة من سنوات هسه اسوي

قادر: تخوفنا ياجاهل يمة يمة رجفنا فرغو البيت يلا بعنا ..

_ وحك علي اندمكم..

رفعت المبايل دكيت على سليم كبل جاوب: ها الساحق ، اخووي..

_ سيارتين مسلحة يمي اريدها ، بهل لحظة خالد بيتي اني

_ ابشر

سديتة وعيونهم اكلني وكامو يتراجفون واحد يباوع بوجه الثاني

غايب : شني حزبي انت بوية؟ شنو سيارات شنو سلاح هوة انت منتف ماعدك مصرف بيت ، تجي عمتك اجدي الاكل منا..

_ اعلمكم اصبرو شوية

صعدت دموع تركض اشرتلها للغرفة افتهمتني اريد سلاحي كبل شفتها اشرتلي بطنها هزيتلها راسي جان يصيح عمي جاسم

جاسم : غايب ماتحجي شو سكتت

غايب : اريد اشوف مسريحة ابن اخوي الوحيد ، بلة شلون راح يكتلنا..

همة ويحجون دخلو عشرة ملثمين شايلين رشاشات دفعت عمتي لغرفتها ودموع طبيت لغرفتي قفلتها وعمامي يصيحون..

غايب: يا يا شمالك اسحاق منو هذول منين طبو تريد تفضحنا بالفرع، تكتل عمامك؟

جاسم: معلية اني اسحاق غايب جابنا اتحاسب ويا اني معلية ، جهالي صغار مالهم احد بروح ابوك وليدي ..

قادر: ها غايب ماتحجي

سحبو اقسام وتقدم واحد بصفي عرفتة سليم همس: نكسر رجليهم ونخليهم سكط؟ لو نكتلهم هسه وتخلص من عذابك؟

_ مو هنا سليم مااكدر اضحي بيك وبنفسي ، هذني نسوان مالهن احد بعدي ، وماريدك تتأذا موهسه اصفيهم..

سليم: جا بيديهم ، حتى يبطلون ياخذون فلوس حرام..

عمران: خالد راح يوكف كلبهم ، صدك تريدون نموتهم؟

حامد : لعد داز علينا ايوب نتغدة يمة؟ صدك تحجي!

عمران: اهبل ماتسمع يصيحولة اسحاق! ولك ايوب اسم الشغل طلع شبيك ما تلكطها

أسحاق: اني انتضركم تخلصون حجي شعدنا النهار طويل

سليم: اعذرني يابة عساس جماعتنا جبتهم

عمران: ولله عد عيناك بس اشر

حامد: نخطفهم؟

عمران: ماكو فايدة الضاهر راح تضل غبي…

أسحاق: بس خوفوهم محد بيكم ياذيهم افتهمتو؟ بزايد اجرحوهم جرح خارجي انتبهو ماريد اورطكم بقتل خوش؟

سليم: عدي عدي معليك

هزيت ايدي اضحك شلون عصابة جبت وكفت بنصهم اصيح : ها عمامي ها اخون ابوي ، مكفاكم موتة اهلكم جاين تاكلون حك الايتام بعد؟ شوفو هذول الشباب دمهم حار وميعرفون يطبون مكان اذا ما ينزلون دم ، فاختارو تريدون يسكطوكم لو يموتوكم وترتاحون للابد..

جاسم : لاااا للاااااا مااريد اموت اني اسحاق اكتل غايب هوة الخطط الكلشي اكتلو هوة مااريد اموت..

نصدمت من خوف عمي وهوة يتوسل ويبجي حتى مايموت عكس قادر الجان ينتضر غايب يحجي لو يصرف واخيرا حجة غايب بعد صمت : هذا الثار ما يخلص يمنا اسحاق

باليوم الطخ واحد منا يصير ثارك ويا ولدنا وسالفة تبقى سنين..

_ جا خوش خالد اخذو راحتكم

بس كلت هل جملة مااحسهم الة رمو البيت زرفو تزرف عمي جاسم اغمى علية من الخوف ، غايب ركض برة بدون نعال وعكالة وكع وقادر يركض ورا يريدون يشردون من البيت ، رماهم سليم بجتفهم وكعو باب البيت يونون راح يمهم يصيح..

سليم: رجعو لبيتوتكم لااخلص عليكم اغمض وافتح مااريد اشوف خلقتكم ويا ويلكم وسواد ليلكم اذا شفت واحد واصل عتبة هل باب بعد..

قادر : كوم غايب كووم

بلكوة كامو بشارع يركضون ، صعدت لدموع بسرعة: دموع لبسي جادرج وصعدي للسطح صيحي حرامية..

نزلت ركض لعمتي لكيتها تبجي اخذتها بحضني ضمتني تصرخ: يا زيد ياخوي متت وضلت العارية

_ اني يمج عمة محد يكدر يأذيج

كفاح: اسحاق منو هذول منين جبتهم

_ اصدقائي عمة اي احد يضوجج بس كليلي يجوج يزرفو ..

ضحكت وحضنتني نزلت دموع تركض : اسحاق اديان واهلها بالباب اجو على صوتي

_ اي احد يحجي تكولن حرامية خوش؟ ومستحيل هذول الجبناء يحجون شي وحتى لو حجو محد يصدكهم

كفاح : شراح ينظف البيت هسه

دموع: اصيرلج بيت صدك جذب بس كليلي شبيهم وياج

دنكت راسها واني واسحاق واحد يباوع بوجه الثاني ننتضرها تجاوب كالت: طلبو مني اوقعكم على تنازل حتى لو اسممكم اجبركم احبسكم لو اني اتنازل عني حصتي بهذا البيت

ضحك اسحاق مستهزء:- وداعتج لو ماهذا من ريحة ابوي وجدي يوم ما ابقى بي خل يولون محد يكدر يسويلج شي..

راح يفتح لباب للناس واني اباوع لظهرة واذكر اخر يوم لابوية:

صوت صريخ النسوان والاطفال بالمنطقة، و رمي الطلق، الدم تارس الطرمة ، ابوية واكع بطرمة اخر نفس ، اني فوك راسة واسحاق على صدرة، اسمع اخر كلمات ابوية بهاي الدنيا: بنيتي دموع عينج على اخوج، واحد يسند الثاني صيرو درع وغطة لنفسكم…عذريني مكدرت احميكم..

_________

يُتبع..