سألني في آخر جملة فرديت عليه:
ــ معاك حق يا ابني، _ وجهت كلامي لأختي _ يا أختي وفيها إيه ؟ منا ربنا مرزقنيش ببنات بس رزقني برجالة ميهونش عليهم تعبي وأول ما أتعب ميخلونيش أعمل أي حاجة وهما يكنسوا وينضفوا ويطبخوا كمان، حتى جوزي مش بيهون عليه أقف أعمل حاجة وحدي وبيقف معايا.
قالت أختي باعتراض:
ــ لاء طبعاً غلط.
رديت أنا:
ــ مش غلط، مش علشان أنتِ طلعتي واتربيتي على كدا يبقى هو ده الصح، ربنا يحببهم في بعض ويهدي سرهم.
مشيت أختي لما معجبهاش الكلام فقربت من بنت أختي وحضنتها وطبطب عليها وقولت:
ــ متزعليش منها، هي بتحبك والله، ــ بصيت لجوزها وأنا بوصيه ــ شيلها جوه عينك يواد، لو عرفت إنك زعلتها هزعلك أنا.
ضحك وقال:
ــ دي جوه القلب والعين متخافيش، هي أي نعم مستفزة حبتين بس يلا كله بثوابه.
ردت هي :
ــ أنت اللي مستفز.
قولت وأنا بضحك:
ــ جرا إيه بقى ما تهدوا, اسيبكم أنا بقى.
حضنت بنت أختي وودعتهم ومشيت وأنا بدعي لها بهدوان السر وإن الحب والمودة اللي ما بينهم يستمروا.♡
#ولاء_عمر
(اللَّهُمَّ أَنْتَ رَبِّي لَا إِلَهَ إِلَّا أَنْتَ، خَلَقْتَنِي وَأَنَا عَبْدُكَ، وَأَنَا عَلَى عَهْدِكَ وَوَعْدِكَ مَا اسْتَطَعْتُ، أَعُوذُ بِكَ مِنْ شَرِّ مَا صَنَعْتُ، أَبُوءُ لَكَ بِنِعْمَتِكَ عَلَيَّ، وَأَبُوءُ بِذَنْبِي فَاغْفِرْ لِي؛ فَإِنَّهُ لَا يَغْفِرُ الذُّنُوبَ إِلَّا أَنْتَ).