ومش هبعد.
بصتلي، وكانت دي أول مرة أشوف الدموع واقفة على حافة رموشها.
مسحت دمعتها بسرعة وهي بتضحك بخجل:
-شايف؟ حتى وأنا بعيّط بضحك…
شكلها عادة خلاص.
قربت إيدي من إيديها… لكنها هي اللي مسكتني الأول.
مسكت إيديّ كأنها مش عايزة كلمة… بس عايزة وجود.
وقالت بصوت واطي حقيقي…
-هتفضل هنا حتى لو خوفت؟
رفعت راسها وبصيتلها من غير تردد:
_حتى لو خوفتي وأنا كمان خوفت…
هفضل هنا.
وساعتها…
عرفت إن لحظة الصدق اللي بينا دي أهم بكتير من أي “بحبك”.
لإن أعمق حب بيتولد من حاجات صغيرة…
زي دمعة مكبوتة… واعتراف طالع من القلب… وإيدين ماسكين بعض من غير شروط.
—
من بعدها… من الليلة اللي ليلي اعترفت فيها بخوفها، الدنيا اتغيرت.
مش فجأة… لأ.
لكن حاجة صغيرة كانت بتتحرك جوايا كل يوم، كأن باب اتفتح، وأنا مش قادر ولا عايز أقفله تاني.
بقيت أصحى الصبح… أول حاجة تدور في دماغي صورتها.
ضحكتها.
صوتها وهي بتقول اسمي.
طريقة كلامها اللي بتدي للحياة معنى ماكنتش بشوفه قبل كده.
وأنا؟
ماكنتش أنا…
أو يمكن… كنت أنا الحقيقي اللي مخبيّاه جوا كل الحيطان اللي بنيتها حوالي قلبي.
بقيت أكلمها أكتر… أخرج من منطقتي اللي مفيهاش غير صمت وخوف.
بقيت أروح الأماكن اللي هي بتحبّها…