لقيت فجأة ولد صغير كتكوت كده، جاء وبيقول لي بكل أدب
– ممكن يا طنط ألعب معاكي أنتي وبنتك؟
أنا ضحكت وقلت له إن فريدة أختي مش بنتي، ولعبنا احنا الثلاثة.
الولد اسمه عمر أكبر من فريدة بست شهور… عرفت إن مامته ميتة من أول ما اتولد. استغربت إن الولد متربي أكثر مني… أنا فريدة أختي يوم ما قالت لخالتي “يا خالتو” بدل “يا سمااااح” كانت لمصلحة علشان توافق خالتي.
بعد ما اشترينا آيس كريم لقيت عمر بيقول لي
– طنط هو أنتوا كل يوم بتيجوا هنا؟
كنت حقول له لأ، بس لقيت فريدة أم لسان قالت له
– إحنا بنيجي كل سبت وخميس.
· – بجد؟ أنا حاجي كمان كل سبت وخميس. سلام.
روحنا على البيت ومكلمتش فريدة في الموضوع… بس علشان شفت فرحة عمر. مر أسبوع واتنين وتلاتة وأربعة وخمسة وإحنا بنتقابل… ومكنتش عارفة إن عمر أصلاً معاه حد… كنا بنلعب ونتكلم ونشتري آيس كريم… وأي أكلة بعملها أنا أو ماما وبتكون حلوة بأجيب له منها.
فريدة أختي بدأت تعمل مشاكل مع عمر… بس كان يسكت… وأنا بصراحة مكنش هاين عليا فكنت بأستغل فرصة عدم وجود ماما وأقوم مهزقها ومهدداها تفتح بقها بكلمة لماما.
في يوم جات مع عمر ست كده… أكبر مني وأصغر من ماما…يعني كده في آخر الثلاثينات… خليت فريدة وعمر يلعبوا وأنا قعدت معاها… وأول حاجة قالتها لي هي إنها عايزة رقم ماما… أنا استغربت وسألتها ليه… بس هي مرضيتش تقول لي وأصرت… قلت يمكن عايزة تتعرف على ماما بما إننا بنفس الحي… اديتها رقم ماما واتكلمنا شوية وخلاص روحنا أنا وفريدة.