خلصت كل اللي بعمله وطلعت أقف في البلكونة شوية، بما إني من مغرمين الجو الشتوي ده، وقفت وفي إيدي مج نسكافيه وعلى كتفي شال جدتي الله يرحمها
فضلت واقفة وكل شوية أبص للسما وللنجوم اللي فيها واتنفس بأريحية، إحساس فظيع مقدرش أوصفهولكم بصراحة لازم تجربوه بنفسكم علشان توصلوا للي حساه، شوية وسمعت صوت تكسير وكركبة كبيرة
_آسف بس ممكن مج من عندكم، زي ما سمعتي كده كل المطبقية وقعت واتكسرت كل حاجة فيها
_تمام مفيش مشاكل
دخلت وجبتله مج وطبق وكوباية لو حب يشرب شاي فيها وطلعت البلكونة تاني
_اتفضل
_شكرًا والله مش عارف أقولك إيه
_لا عادي، الجيران لبعضيها
_أنا نائل، جاركم من شهرين هنا علشان شغلي قريب من المكان اللي شوفتك فيه كده
_أهلًا وسهلًا بحضرتك
_وأنتِ اسمك إيه؟
سكت ومرديتش عليه، مش قلة ذوق بس متعودتش إني أقف واحكي واتكلم مع حد معرفوش
_آسف تاني لو ضايقتك، عن اذنك
_اسمي مريم
_شرف ليا معرفتك يا مريم
_تسلم
فضلنا واقفين شوية حلوين، بس فضلت ساكتة وهو كل شوية يحاول يفتح موضوع وكل ما يتقفل موضوع يفتح غيره لحد ما قررت ادخل من البلكونة وكفاية لحد كده النهاردة
بس النهاردة جاب بكرة، جاب بعده، جاب أسبوع كل يوم بنقف في نفس الميعاد ونتكلم في أي حاجة ونشرب نسكافيه سوا وبعدين ندخل ننام، كأنها بقت عادة إننا نعمل كده