عبدالرحمن: تلت مرات
فريده: لا خمسه.. عشان بنصلي خمس مرات
كارما: صح كده.. خمس مرات يا عبدالرحمن.. يعني فالخمس مرات دول شوف بتنضف كل شوية ازاي وبتاخد حسنات كتييير!!
عبدالرحمن رد بثقة: انا علطول بستحمي ونضيف
ادهم ضحك: شاطر.. دي من الحاجات الجميلة.. لازم نبقي دايما نضاف.. الصلاة بتخلي الأنسان علطول طاهر ونضيف لانه مضطر يبقي نضيف وهو بيقابل ربنا ويصلي صح؟
فريده: وكده الناس الوحشه الى مش بتصلي ربنا مش بيحبها؟
ادهم ابتسم وبصلها: ربنا بيزعل منهم اوي.. بس لما يفوقوا يا فريده.. ويرجعوا لـ ربنا يتوبوا و يستغفروا وهما حاسين بالذنب ويفضلوا يدعوا ان ربنا يسامحهم.. فا بيرجع يحبهم تاني و يسامحهم لأن احنا ملناش غير ربنا نرجع له صح ولا ايه؟
ابتسمت: اممم ايوه.. خلاص يا بابا سوري..
انا هفضل اصلي علطول معاكم.
عبدالرحمن: ايوه صلي معاهم بدال ما كل شوية تلغبطيني كده
فريده بصتله بنص عين: انت اصلا صوتك عالي اوي وانت بتصلي !!
كارما ضحكت: هدوا نفسكم بس.. خلينا دلوقتي نفطر كلنا ونشوف الموضوع ده في صلاة الضهر أوكيه؟ يلا روحوا اغسلوا ايدكم
” جريوا على الحمام وهما بيتخانقوا مين يغسل ايده الأول كالعادة.. ”
أدهم اتنهد: انا عارف انك بتتعبي اوي معاهم بس انا مقدر ده وفخور بتربيتك ليهم اوي يا كارما..