كنت ببص له بخوف وأنا بحاول أربط الكلام اللي بيقوله باللي شفته منها.
يعني هي فعلاً مش بشرية؟
سُهى قالتلي بعدين إنها “روح معاقبة”، كانت إنسانة زمان وعملت شر كبير، فبقت تفضل تنتقل من جسد لجسد، تعيش مع أول راجل يقبلها لحد ما تدمره، وبعدين تنتقل للي بعده.
ماما كانت بتبكي وهي بتسمع، وقالت وهي تمسك المصحف بإيدها:
يبقى مفيش حل غير إننا نطردها بآيات ربنا.
وفعلاً، جبنا شيخ معروف في المنطقة. جه تاني يوم الصبح، وبدأ يقرأ القرآن بصوت عالي.
الغريب إن البيت كله كان بيترج من الصوت، وكأن الحيطان نفسها بتصرخ.
وأول ما بدأ سورة البقرة… الباب اتفتح لوحده.
دخلت تيارا، عيونها سودة خالص وسنانها رجعت حادة زي الأول، بس المرة دي كانت بتعيط، مش بتضحك.
وقفت قدام الشيخ وقالت بصوت مكسور:
سيبوني أخلص… أنا تعبت.
الشيخ سألها:
إنتِ مين؟
قالت:
أنا كنت إنسانة، كنت أظلم الناس وأأذيهم، والست اللي بتقولوا عليها “سُهى” هي اللي حبستني في اللعنة دي. كل راجل يقبل “الهدية”، أنا بروح له، أعيش معاه لحد ما يتوب عن ذنوبه… وبعدين أختفي.
سكتت لحظة، وبصت لأيمن والدموع بتنزل من عينيها:
وإنت كنت أول واحد فعلاً ندم على كل حاجة، فدلوقتي دوري انتهى.
الهوى في البيت بقى دافي فجأة، والنور اشتغل بهدوء، وصوت الشيخ كان بيكمل قراءة.