القلم اللي ابويا إداهولي قبل كده بسببك للاسف
مفوقنيش
دموع امي وقهرتها وهي شايفاني كل شويه بتعارك مع ابويا مفوقتنيش
نظره ابويا اللي كلها لوم وعتاب رغم القوه اللي بيظهرها مفوقتنيش
بس من كم ساعه قلم صغير من حد محدش يتوقعو هو اللي فوقني وخلاني اشوف صورتنا من بره
لو كملنا مكناش هنرتاح ولا اللي بيحبونا كانوا هيرتاحوا
عمك هيخسر شغله واحنا حياتنا هتتدمر عشان وضع شغلنا الحساس
اهالينا هيغضبوا علينا ومفيش حد اهله بيغضبوا عليه وبيعيش مرتاح ابدا
لا انتي كنت هتعلني اسلامك وتتبري من اهلك
ولا انا كنت هقدر اهرب وابيع اهلي عشان اعيش معاكي بعيد عن الكل وابقى كسبتك وخسرت الكل
لو مكناش انانيين كنا قدرنا نفكر بالعقل من الاول ونعرف ان علاقتنا مستحيله
مكانش زمان قلوبنا وجعانه وبنتعذب
تنهد بهم وكانه ينسلخ من جلده ثم اكمل بحزن شديد
انا بحلك من اي وعد….. عيشي حياتك وحاولي تنسي
لو الانسان اللي اتخطبتيلو كويس ويستاهلك كملي معاه حياتك وحاولي تتقبليه
خرجيني من حياتك عشان تبداي تشوفيه بعين ثانيه او تشوفيه اصلا وتحسي بيه
ولو مش هو اكيد هتلاقي اللي يستحقك
انا كده قلت اللي عندي لو عندك حاجه قوليها وانا هسمعك عشان فاضل حاجه واحده بس هي اللي هطلبها منك بعد اما تخلصي كلامك ونقطع الصفحه