زقت عائشة الكرسي برجليها لورا واتحركت ناحية أنس بهدوء ينافي غضبها وانفعالها من كذبه الغير مبرر والغير مفهوم ومن تصديق زوجها لكلام زي زي ده بدون نقاش أو تحذير للولد بمدى خطورة وسوء فعله.
مسكته من ايده بعد ما ساعدته في النزول عن الكرسي اللي كان أكبر منه واتحركت بيه بنفس الهدوء لغرفته، غابت فيها معاه لدقايق معدودة وسابت زوجها برة بياكل في نفسه من الغيظ والغضب.
خرجت من الأوضة وقفلت الباب وراها بإبتسامة لإبنها، إبتسامة تلاشت تمامًا وهي بتلف لمواجهته، ولكن قبل ما تتكلم أو تقول أي حاجة عن الموقف سبقها هو بوقوفه وتحركه ناحيتها بخطوات واسعة سريعة..
مسكها من دراعها بعنف، احمرار عينيه ووشه كانوا أكثر من كافيين للدلالة على وصوله ذُروة غضبه وفقدانه القدرة على التحكم فيه وكبته لفترة أطول.
اتكلم وهو بيجز على أسنانه بنظرات كافية جِدًّا لإرعابها وإفقداها حتى قدرتها على التبرير أو الكلام:
_ كويس إنِك دخلتيه، لأن واضح إن في كلام كتير أنا معرفوش محتاجين نتكلم فيه.
ولتالت مرة على التوالي ماسمحش ليها تتكلم وشدها بنفس العنـ.ـف والقوة ناحية أوضتهم، زقها لجوة دون أن يلقي بالًا ليها وقفل الباب عشان صوتهم مايوصلش لإبنهم ولَف بصلها..