احمرت وجنتيها خجلا لتهبط بوجهها لاسفل تنظر للاطباق المتراصة امامها فى حين صمت لبرهة وهو ينظر ارضا ليكمل بعدها اعترافه المجنون بالنسبة لها
_احنا مبنقولش بنحب فلان علشان ايه، وفيه ايه، احنا بنحب فلان لانه هو كدة وانا حبيتك، يمكن انتِ مليانة مميزات بس انا مش هدور على كل ميزة انا حبيتك كلك على بعضك، بحبك يا جنى لانك جنى، بحبك بعيوبك ومميزاتك وعايز اكمل حياتى معاكى
صمت ينظر داخل عينيها قائلا بجدية وضيق
_يمكن تكونى بتشوفينى انسان مجنون علشان اول لقاء بينا مكانش اوى او اكون مهووس وببتدع بدع وكلام مش حقيقى، لكن اقسملك يا جنى انى عمرى ما كدبت عليكِ فى اى كلمة او اى حرف خرج من بوقى، كل كلمة قولتها كانت حقيقة، وكل موقف كان فعلا حقيقة ومش بكدب فيه
سحب شهيقا طويلا تحت نظراتها المتفحصة له ليكمل برجاء شديد
_وانا مش عاوز غير فرصة فرصة واحدة تعرفينى واعرفك، فرصة تخليكى تشوفى باسل الدمنهورى وتتقربى منه وادخل البيت من بابه ووقتها احكمى اذا كنتِ شايفانى انسان مناسب ليكى ولا لا لكن لو متوفقناش اوعدك هبعد، بس على الاقل اكون خدت فرصة منك وقلبى خد فرصة يكون جنبك، لكن ارجوكِ بلاش تحرمى قلبى من الدخول لجنته اللى بيتمناها فى قربك، بلاش تحرمى قلبى من انه يقرب من الانسانة الوحيدة اللى دقلها، وانا اوعدك انك لما هتعرفينى من قرب اكيد هتحبينى