ابتسمت بخجل وحياء حينما وصل رأسها لتلك النقطة، لتبعد التفكير عنها هى تعود بعينيها جهة الشارع.
اما بالنسبة لذلك الملفت فهو دخل للمنزل يحمل تلك الحقائب من المشتروات التى جلبها ليعطيها لوالدته قائلا بضيق
_خدى ياستى جيبتلك السوبر ماركت كله اهو
ثم اكمل بضيق
_وفى الاخر لما اقول عاوز آكل مالاقيش غير بيض وجبنة ولبن مش عارف امال الاكل ده بتودوه فين
نظرت له والدته لتجيبه بهدوء
_طيب انا اعملك ايه اذا كنت مابتاكلش فى البيت غير الفطار، والغدا بتاكل فى الشغل، وتيجى لليل ماترضاش تاكل لحوم ولا حاجة وتقول هاتى اكل خفيف؟
نظر لها بطرف عينه ليقول بسخرية
_ماهو ده اللى ناقص آكلك لحوم ومحشى والكلام دة بالليل يطبق على نفسى معرفش انام، لا ياحبيبتى يفتح الله
مطت شفتيها تضع الاشياء على طاولة السفرة وهى تجيبه بلا مبالاة
_خلاص ماتتكلمش، اعملك ايه يعنى؟ تكونش اعملك اسكالوب على الفطار؟
نظر لها بطرف عينه ليتحرك جهة الاريكة يجلس عليها بجوار والده براحة وهو يقول بسخرية
_لا ودى تيجى، فأكلينى كل يوم نفس الفطار
ثم رفع وجهه يقول بضيق
_ابتدعى شوية يا سوسو، خلى فيه جديد، انا سبعة وعشرين سنة بآكل نفس الاكل، ايه مفيش فى الدنيا حاجة غير البيض واللبن والجبنة؟