صمت ثم اكمل بقوة
_التلاتة فى حمايتى انا ونبيل بيه وان حصل وضايقهم حد او قال كلمة مش محترمة عنهم مكانه هيبقى برة، لان دول ناس ولاد اصول وصعايدة والشرف عندهم غالى، فاهمين؟
هز الجميع رءوسهم فى حين صرخ هو بالامن ليلقو هذا الشاب بالخارج، لينظر جهة نبيل الذى قال بقوة
_ملوش مستحقات لانه اتطاول على مديره وبيطلع اشاعات عنه، وسايب شغله وبيتسرمح
ثم اكمل بجمود
_وكمان قل ادبه على زميلة ليه بمنتهى الحقارة
ثم تحرك قائلا بجدية صرامة بعيدة عن مرحه المعتاد
_الظاهر ان محتاج المكان هنا يتشد عليه اكتر، وانا هعمل كدة فعلا
ثم نظر لهم بقوة ليقول بصوت مرعب
_كل واحد على شغله
ودون كلمة اخرى كانو يتحركون على راس عملهم،
كل ذلك الوقت كانت هى تقف مكانها وتسعل بين الفينة والاخرى ليهز نبيل راسه بتعب وهو يقول بضيق
_انتى تعبانة؟
_يعنى
قالتها لتكمل سعال ليقول باسل بمرح
_يعنى ايه؟ دة انتى نَفَسِك اتقطع من الكحة وتقولى يعنى
قال نبيل بمرح
_بيتهيألى انك محتاجة تغيرى الصنف اللى بتشربيه، الصنف دة مش حلو استنضفى شوية
قطبت جبينها تسأله ببلاهة
_صنف ايه؟
ضحك ليجيبها بمرح
_المعَسِل والشيشة
اتسعت عينيها بصدمة ليضحكو جميعهم عليها فى حين كانت تهمس داخلها على نبيل