انهت كلماتها لتدخل فى نوبة سعال لينظر هو لها ساخرا ثم قال باستهزاء
_والله!! وانتى محموءة علشان محدش فيهم عبرك ولا ايه يا دكتورة؟
اتسعت عينى اميرة فى حين اكمل ذلك المدعو علاء بصراخ
_اهو الدكتورة دى امبارح كانت واقفة مع شاب وسابته وراحت قعدت مع باسل بيه فى مطعم، وبعدها قعد معاه فى الشارع، والتانية دى وقفت مع واحد وبعدها روحت مع التانى تفهموها ازاى بقى
فتحت جنا فمها للحديث حينما سمعو ذلك الصوت الصارخ بغضب
_يفهموها انك هتروح على نقالة النهاردة يا روح امك
وقبل ان يستوعب احدهم شئ كان ذلك الجسد الضخم يتدخل ليقف امام الفتيات ودون كلمة كان يسحب علاء ويلكمه فى وجهه بقوة لكمة فجرت الدم من انفه وفمه تبعها ب اخرى ثم ألقاه ارضا ليكمل عليه،
اتسعت عيون الفتيات بصدمة وهم يجدون باسل الدمنهورى اصبح آخر غير معتادين عليه، بل كان اشبه برجل كهف فى تلك اللحظة مُصِر على قتل احدهم،
شهقت شيرين وهى ترى منظره المرعب وهو يهجم على هذا الشاب يكاد يقتله بين ايديه فى حين وقف نبيل بالخلف يقول ب ابتسامة لا تخلو من جدية مرحة وهو يعقد يديه على صدره
_اضرب براحتك يا ريس، بس اهم حاجة متقتلهوش اصل التلاجات مش هتكفى
ثم اكمل بسخرية
_وبعدين لحوم البشر حرام ف مش هينفع نغلفه، كدة هناخد ذنب