اومأت برأسها لينظر هو للخلف قائلا بجدية
_ابن عمك خسر لنفس السبب على فكرة
لم تفهم حديثه ليجيب بتوضيح
_البنت محتاجة الرقة والحنان، محتاجة اللى ينقى كلامه وهو بيتكلم معاها وميجرحهاش ويعرف انه مش بيتكلم مع واحد صاحبه ولازم يتعامل معاها على انها كائن مختلف عنه ومشاعره مرهفة اكثر يعنى ميرميش كلام وخلاص، ودى مشكلة ابن عمك انه مش بيخلى باله من النقطة دى هو شايف ان البنات والولاد واحد والمعاملة واحدة
ارتفع حاجبيها بصدمة لتسأله ساخرة
_وتفتكر الكائن الى معاها ده هو اللى بيتعامل بأسلوب مختلف
ظل ينظر جهتها ليقول اخيرا
_المشكلة مش فى الشكل والمظهر المشكلة فى المشاعر، وكل ما كانت مشاعرك اقوى كل ماكانت معاملتك معاها مختلفة اكتر، مميزة اكتر بدون ماتحسى، بتكونى حنينة معاها وبتحطيها فى مكان تاتى محدش وصله وبتعامليها معاملة ماعاملتيهاش لغيرها، وبتبقي عايزة تحكى معاها عن اى حاجة وكل حاجة حتى النفس اللى بتتنفسيه
صمت ينظر لها لبرهة بنظرات غريبة جعلت وجنتيها تحمرات خجلا فى حين تنحنح هو ليبعد عينه بعيدا ثم اكمل
_وده اللى لاحظته فى التانى نظراته ليها مختلفة موجوعة اه بس عاشقة وتايهة، مش عارف يعمل ايه زى المربوط، موجوع منها بس مش قادر يعمل حاجة او يرد الوجع