صمت ينظر امامه بشرود قائلا بألم وهو يتخيل مشاعر الاخرى وقد استمع لشكواها ذات مرة
_عارفة ريحان قالتلى ايه؟ قالتلى اذا كان كدة من اخويا تفتكر اللى هتجوزه وهو غريب عنى هيعمل فيا ايه؟ اذا كان اخويا بيعمل فيا كدة وبيجوعنى يبقى هو هيدبحنى!!
تأوهت جنا بألم عليها وإلتمعت عينيها بالدموع فى حين أكمل هو ب انكسار
_منين هتجيلك الثقة ف الغريب اذا كان القريب بيعمل فيكى كدة؟ المشكلة انه كسرها مش بس ضربها، هو كسر ثقتها فى نفسها والناس حواليها، كسر رابط الاخوة وكسر معاه ثقتها فى اللى حواليها لان مستحيل يكون حد أحن عليها من أخوها
نظرت له لتقول برقة
_واضح انك بتحبها اوى
هز كتفيه يجببها ببساطة
_ريحان بنت بسيطة وكويسة وفوق كدة انا راجل ما اقبلش ان فيه بنت تضرب قدامى واسكت، يعنى لو اختى مستحيل كنت ألمسها بالعكس انا شايف ان البنات هما نبع الحنان والرقة وميلقش بيهم غير الدلال
وعلى ذكر هذا الحديث سألته هى بتعجب
_هو انت عندك اخوات؟
هز رأسه نافيا وهو يرتشف بعض قطرات من العصير أمامه
_لا معنديش غير جميلة دى لو اعتبرناها اختى فعلاً
قطبت جبينها بعدم فهم تساله بتعجب
_جميلة!!
اومأ برأسه يجيبها ببساطة
_جميلة بنت عمى بس بحبها زى اختى الصغيرة وبعتنى بيها من طفولتنا