_ربنا يزيدك من نعمته يا معلم بس مش كدة خالص، هو الموضوع مالوش علاقة لا بالفلوس ولا بالتعليم، الموضوع ليه علاقة بالقبول وكل شى بالخناق الا الجواز
نظر لها ليقول بغير رضى
_يعنى انتِ مش موافقة عليا
زمت شفتيها بضيق لتربع يديها قائلة بغضب مكبوت وهى تهز قدمها بضيق
_انتَ شايف ايه؟
كانت اجابتها واضحة دون الحاجة للحديث وهو يستطيع لمح اعتراضها هذا ولكنه لا يتقبله، بالله عليها ما سبب هذا الرفض منها؟ هو ليس سئ البتة، فهو ليس كبير بالعمر انما هو فقط ثلاثون عاما، يملك قهوة تدخل له دخل جيدا جدا، ويحبها، ولم يسبق له الزواج، اذا ما سبب الرفض؟ ليجيبها بضيق
_ادينى سبب للرفض
_ييتهيألى لما تعوز تتكلم مع بنت فى الجواز تتكلم مع ابوها وتدخل البيت من بابه مش تقطع عليها الشارع وتتكلم معاها زى البلطجية يا معلم
اعتدل نوح فى وقفته وهو يسمع صوت سعد الغاضب ليقول بخجل
_عم سعد
ركضت اميرة بسرعة تقف بجوار والدها تلتمس منه الحماية والامان ليلف سعد بعينه لها ثم اشار لها بالذهاب لتلبى هى امره الغير منطوق فى حين نظر للاخر ليقول بضيق
_بيتهيألى فيه راجل تتكلم معاه يا معلم نوح وهو يديك اجابة لطلبك لكن انك توقف بنتى فى الشارع وتعرّضها للكلام من اللى رايح واللى جاى ميصحش، ولا ايه؟ انتَ راجل وابن بلد وعارف انه مش صح على سمعة البنات، وبعدين من امتى الكلام ده بيتقال فى الشارع ومع الحريم؟
احنا اتربينا ان الكلام يبقا بين راجل لراجل وفى البيت والواحد ياخد واجب الضيافة، لكن شغل انك توقف بنت فى الشارع وتكلمها ده لا يصح ولا يتقبل