كتم كل تلك الافكار داخله ليصرخ غاضبا
_مش عارف عملت ايه ياحاج محمد!! مش عارف بجد انت عملت ايه؟
صمت يلهث بغضب من فرط انفعاله ليصرخ بجنون
_رايح تجبر واحدة على الجواز بإبنك وكأنه معوق!! بتاخدها بالمقايضة؟ تستغل ضعف الناس وحاجتهم علشان تنفذ اللى فى دماغك، بتهينهم وتهين كرامتهم بس علشان تخليها تتجوز ابنك!! خلاص احترام الناس عندك انعدم كدة؟
بهتت ملامح محمد بشدة وشحبت لدرجة انها اصبحت تشبه الاموات وهو يتفاجئ بمعرفة ابنه للسر الذى عمل جاهدا على اخفائه فقط لاجل سعادته ولكنه مع ذلك صرخ غاضبا
_اه عملت كدة واعمل اكتر من كدة كمان اذا كان ده هيسعد ابنى
اتسعت عينى رافد بذهول وصدمة من إجابة والده الغير متوقعة وهو من كان يمنى نفسه ان ينكر كل هذا، كان يمنى نفسه ان ينفى الامر ويكون الامر غير هذا، يكون الامر كذب وما هو الا تلفيق من والدها فقط رغبة منه فى زواج ابنته منه ولكن إجابة والده ضربته فى مقتل،
تراجع رافد للخلف بصدمة وهو ينظر الى والده بعدم تصديق ليكمل محمد غاضبا بشدة
_متبصليش كدة، اه انا عملت كدة وكنت مستعد اعمل اكتر من كدة علشان خاطر سعادتك وان كانت سعادتك انها تكون معاها حتى لو بالاجبار ف هجبرها المهم تكون مبسوط، انا ماعنديش اغلى ولا اهم منك انت، انت ابنى ووحيدى ودنيتى كلها اللى ربنا ممنش عليا غير بيه