وقبل ان يوضح الامر وجدها تكمل وهى تهز كتفيها قائلة ببساطة
_ودلوقتى اكتشفت انه كله ده مبقاش موجود وكله ده ما هو الا كذبة تفتكر فى لحظة تقدر تاخد قرار وتعرف هى عاوزة ايه؟ اكيد لا هى محتاجة وقت تفهم اللى حصل وتبص كويس ليه وتاخد قرارها
نظر لها ليقول بضيق من فتح هذا الامر
_والمطلوب؟
اجابته بجدية
_المطلوب عندك انتَ، واجابة اللى بيحصل معاك انتَ، علشان كدة سألتك، وعلشان كدة قولتلك مش عاوزة الاجابة لانها معاك، المطلوب هو انك تديها وقتها قى التفكير، انك تقف قدامها وتعرفها مين خطيبها والانسان اللى معاها بجد مش اللى كانت شايفاه، توريها قلبه وبيحس ب ايه، تمسك ايدها من الضلمة للنور علشان تعرف هى مكانتها فى قلبه ايه، حب ولا احتياج ولا اجبار ولا مجرد بنت عادية لفتت الانتباه وعاوز يتجوزها بس بعد اللى حصل مش عاوزها، لو بتحبها هتسندها لحد ما تطلع من نفقها المظلم، لكن لو مش بتحبها او شايف ان العلاقة دى هتكون مسمومة يبقى سيبها ومتخليهاش تتوجع اكتر، كفاية الوجع اللى شافته
ظل رافد ينظر لها بذهول وهو يرى تلك الفتاة التى ظنها فى لحظة مجنونة وسليطة اللسان يراها الان تتحدث بكل هذا الهدوء والعقلانية وكأنها فتاة كبيرة عاقة وهادئة، تعطيه النصائح على الرغم من فارق العمر بينهم، لا تخجل من كونها فتاة تتحدث بهذا الامر المحرج مع شاب والذى يُعتَبَر فى مجتمعنا الشرقى امر مُخجِل وُمعيب، ولكنها تحدت كل الاعراف لاجل صديقتها ليسألها هو هذه المرة بنبرة هادئة حنونة بعض الشئ