_ انا مش مستنية اجابتك ليا انا مستنية اجابتك لصاحبة الشأن، انت دلوقتى عارف هى كانت حاسة ب ايه واتعرضت لايه وكانت شايفاك ازاى، ايوة هى غلطت ما اقدرش اقول غير كدة ولا اقدر ادافع عنها بس هل ياترى حطيت نفسك مكانها ومكان مشاعرها؟ حطيت نفسك فى احساس انك بلا كرامة قدام حد وهيفضل يذلك بدينه العمر كله؟ احساس كسرة والدك وانت متعرفش الاب بالنسبة للبنت بيبقى عامل ازاى، الاب بالنسبة للبنت هو امانها فى العالم دة كله، هو قوتها وثقتها، هو اللى بتترمى عليه وترمى عليه همومها وواثقة انه هيشيل حملها كله واكتر، هو ثقتها بتفسها وقوتها، هو اللى معاه متاكدة انه طول ماهو موجود محدش يقدر يأذيها، هى اللى بتبقى ماشية ومش مهتمة بحد لانها واثقة انه هو موجود، فما بالك لو كله ده اتكسر قدامها وقوتها وقدوتها وثقتها وامانها اتشالو ومظهرش غير الضعف منه تفتكر هتحس ب ايه؟ فى اللحظة دى هتحس بالعرى وبان ضهرها اتقسم وثقتها وامانها راحو فتفتكر هتبص للى عمل كدة ازاى؟ دة حتى لو ملاك ابيض نازل من السما بيرفرف بجناحاته مش هتشوفه فى اللحظة دى غير شيطان اسود بقرون مخيفة،
انتَ مش حاسس غير بجرح رجولتك وكبريائك وكرامتك بس مشوفتش دهس كرامتها وكبريائها وهى بتتلعب بيها الكورة بدون اهتمام بيها، مشوفتش وجعها على والدها، مشوفتش استغلال حد جرحها على اخوها، كله ده مشوفتوش، انتَ موجوع ومش شايف غير وجعك وهى كانت بتتحرق ومحدش قادر يحس بنارها.