هز كتفيه ليكمل بتيه وضياع وقد تساقطت دموعه من الالم
_مش عارف ياعمى والله، انا حاسس انى فى دوامة، مش عارف اقف مكانى ولا ابعد ولا اقرب مش عارف
ظل عزيز يتطلع جهته بشفقة وحزن وهو يجد كل هذا التعب والارهاق على محياه، ابن اخيه، جوهرته الثمينه، وابنه الغالى، هو اكثر من يعلم معدنه النفيس وخلقه الجيد، اكثر من يعلم احترامه لذاته ولكن قوانين العشق هى خارج ارادتنا والفتى وقع ب احدى تلك القوانين، اذا ماذا بيده ان يفعل؟
تنهد عزيز بشفقة ليقول بجدية وحزم وقد رأى بأن هذا هو الوقت المناسب للحديث
_بص يا باسم انا اكتر واحد عارف يعنى ايه حب، وعارف برضه ان الحب خارج قوانين العقل وبيخضع لقانون واحد وهو القلب، علشان كدة دايما بنتعب لان القلب مالوش قوانين، ولذلك اهلنا ربونا وقالولنا نحكم عقلنا الاول وبعدها نشوف قلبنا هيرضى ولا لا لان مراية الحب عامية، فكر انتَ كدة ب عقلك وبتربيتك واصولك هل كل اللى بيحصل ده صح؟ هل الدايرة اللى انت واقف فيها دى ده مكانك فيها؟
حبيبى انتَ مغلطتش انتَ حبيت ان اعتبرناه فعلا حب، حبيت بنت كويسة ومحترمة والدنيا تمام لحد ما اكتشفت انها مرتبطة
صمت لبرهة ليكمل بجدية وهو يقول بحسم
_سواء بقا مرتبطة اجبار او لا مادام رافضة انك تتدخل ومادام الموضوع ليه ابعاد تانية يبقى تبعد، البنت اسمها مرتبط بحد تانى واللى بيحصل ده خيانة لا يرضى عنه دين او عرف او اخلاق، فيه كلمة بين رجالة وفيه ارتباط بدأ يحصل بين اتنين والاثتنين دول كبار بما يكفى انهم يحلو مشاكلهم يبقى لازم تبعد وتنساها ومتفكرش فيها لانها على اسم واحد تانى واللى عرفته انه بيحبها بجنون ف مهتجيش انتَ وتكسر قلبه، هما كبار وواعيين والحب اللى فى قلبه هيحل المشاكل، ف انساها خالص وتخطاها ومتحطش فى بالك كلمة لو انفصلو لان اللى انا عرفته ان الولد دة مش هيسمحلها بالبعد لانه بيعشقها من سنين ومش بالاجبار