جلست إسراء في مكتب وكيل النيابة في انهيار تام، ودموع لا ترقأ، ولسانها يُردد في صدق:
_اقسم بالله ما أعرف الحاجات دي جت في شنطتي إزاي..
فتنهد وكيل النيابة في ضجر، وهو يميل إلى الأمام مشبكًا كفيه أمام وجهه، وعاد يسألها في هدوء:
_يعني أنتِ بتأكدي أن المخدرات اللي في شنطتك مش ليكِ؟
اومأت إسراء برأسها إيجايًا، فتفرس وكيل النيابة النظر فيها، قبل أن يقول:
_كل مجرم بيجي هنا لازم يقول الكلمتين دول يا فنانة، وِوحدة زيك فجأة سابت التمثيل ما هو طبيعي عشان لقيتِ شغل فلوسه أكتر.
صرخت إسراء في إعياء:
_بس انا مش مجرمة ومسبتش التمثيل عشان اللي بتقول عليه ده. صدقني معرفش الحاجات دي لقيتوها في شنطتي إزاي؟!
تراجع وكيل النيابة في مقعده، وصمت مليًا بدا بتفكير عميق، وهو يمعن النظر فيها كأنما ينفذ إلى أعماقها ويسبر أغوار نفسها، ثم هز رأسه، وقال بلهجة حادة:
_تمام خلينا نقول إنها مش ليكِ فعلًا، مين هيكلف نفسه يشتري مخدرات ويحطها في شنطتك لمجرد إنه يدخلك السجن؟ أنتِ بتتهمي حد؟!
ومع سؤاله أشرق الأمل في قلبها، وتجمدت العبرات في عينيها وهي ترفع رأسها نحوه، قائلة قي لهفة:
_ايوة في حد أنا بتهم هشام.. المخرج هشام البسيوني.
فتراجع وكيل النيابة في مقعده، ورمقها بنظرة ثاقبة، وهو يقول في تريث:
_المخرج هشام البسيوني مرة واحدة؟ وليه هشام هيعمل حاجة زي دي؟! ولا يكسب إيه لما يسجنك؟!
ثم ضغط على زرٍ دخل على إثره جندٌ فورًا مؤديًا التحية العسكرية وهو يضرب كعبيه في الأرض، هاتفًا:
_أوامرك يا فندم.
فأشار وكيل النيابة له على إسراء، مستطردًا:
_دخلها الحجز.
وهتفت إسراء كمن أصيب بمسٍ من الجن:
_حجز؟! حجز إيه اللي ادخله لأ، لا طبعًا.
وأبعدت كف الجندي، وهي تصيح:
_أبعــــــــــد عنـــــــي أنا مش مجرمة مش مصدقني ليــــــــــــه؟
ومادت بها الأرض فجأة، وسقطت مغشيًا عليها.