رواية هو لا يشبههم الفصل الثالث 3 بقلم تبارك الوائلي – للقراءة المباشرة والتحميل pdf
بعد العشه….
«غرفة ابو صالح »
أم صالح: اليوم اشبيك ضايج وتصفن ابو جمانه؟.
ابو صالح: اليوم حسان لاكاني بالسوك وكلي اسامه يريد جمانه منا لحد ماتكبر.. واني كلتله لا ماانطيها اله لا هسه ولا لمن تكبر.
أم صالح: ياا وهذه اسامه اول خلي يعقل وبعدين يدور زواج.
ابو صالح: اسكتي وسدي السالفه هاي البنيه اظاهر قليله حظ لان كل الي يشوفها يخطبها والكل حاط عينه عليها ابن اختج رادها هم من تكبر.. وابن اخويه هم رادها من تكبر.. واخو جنتنه هم رادها.. ومن غير بنت عمج هم ذاك اليوم اجتي خطبتها.. وين اضمها هاي البنيه عن العيون.
أم صالح: واذا اكلك البارحه جارتي ام زياد كالت اريدها من تكبر بعد كم سنه الزياد وكلتلها الذاك الوكت الله كريم.. بس ماينطيها ابوها والأسبوع الي قبله جارتنه الجديده تعرفت على فرح مرات تسلم من الباب تكول اخويه فايت وشايفها بابكم من مسلمه عليها والولد متخبل كايللها عفيه اخطبيها اليه.
ابو صالح: صدك جذب تحجين شلون تخليها تطلع وتسلم وين شايفها الولد.. اني ادري بجمانه ماتطلع ابد.
أم صالح: لا ذاك اليوم من طلعنه البيت اخوك ابو هدى فايته هيه واخوها وشافتنه وسلمت البنيه ومرت شلون يا رجال قابل احبسها بالبيت.. البنيه كل الي يشوفها يخطبها .. شلون حتى موكفه زواج وخواتها تدري.