+
سمع قصص كثيرة من قبل، استفهم منه بجدية”تعالج أمك بفلوس مسروقة؟ يا أخي تموت وابنها شريف ولا إنها تحيا وابنها حرامي عالجها بفلوس مسروقة!”
+
حقَّر منه والثاني ردد بانفعال وملامحه تحولت إلى غاضبة متألمة”أنا دي أول مرة أسرق، سرقت من الحوجة، أنت بتقول سرقت الإيد إللي اتمدت ليا؟ دي إيد مفترية! مشغلني عنده عبد، فكي اتكسر بسببه وفضلت ساكت وبشتغل عشان هو دا الشغل إللي متوافر دلوقتي رغم إني يوميتي ١٠٠جنيه! ١٠٠جنيه بتخلص في أقل من يوم حتى! شغال مرمطون عنده عشان كام قرش، كل يوم زعيق وشتايم رغم إن محل طويل عريض للنحاس مشغل فيه واحد مرمطون يقوم بشغل أربعة رجالة مع بعض! أمي كل يوم حالتها بتسوء عايزة تعمل عملية والعملية غالية، روحت بوست إيده وهو مش عايز يديني حتى ربع المبلغ سلف عقبال ما أدبر الباقي رغم إنه معاه فلوس كتير! أعمل إيه سرقت، أنا مش ندمان إني سرقت عشان أنقذ أمي حتى لو بفلوس حرام! أنا شغال عنده مرمطون”.
+
توسعت عيونه بذهول، واعتدل في جلسته يتعجب بحديثه”مش ندمان إنك سرقت وعايز تعمل لأمك عملية بفلوس حرام تروح تموت بسببها؟ أنت عارف عقاب السرقة إيه في ديننا؟ بسم الله الرحمن الرحيم﴿ وَالسَّارِقُ وَالسَّارِقَةُ فَاقْطَعُوا أَيْدِيَهُمَا جَزَاءً بِمَا كَسَبَا نَكَالًا مِّنَ اللَّهِ﴾ متستهونش كدا بالسرقة، السرقة عذابها شديد عند الله”.