+
زفر بضيق قبل أن يضيف”وبعدها جه داني يقولي البنت اللي بتحلم بيها! وراح قال لجده وجدته، وبيسألوني أنت بتكلمها؟ ولسه أبوك من الصبح بيتصل عشان يلقي عليا محاضرة! كام كلمة من نوعية أنت خسرت تيا، أنت عملت وعملت، خلاص أنا عارف إني خسرتها، بس بلاش جلد ذات أكتر من كدا، لأني والله ما عملت حاجة غلط ولا حرام!”
+
نظر أحمد إليه مطولًا قبل أن يتنهد قائلاً بنبرة أكثر هدوءًا “طيب، وأنا ممكن أسألك سؤال؟”
+
رفع يحيى حاجبيه قليلًا قبل أن يرد بصوت متعب “قول.”
+
تردد أحمد للحظة ثم سأل بجدية نادرة “أنت متأكد إنك مش زعلان عشان تيا، ولا زعلان عشان كل اللي حواليك قلبوا عليك؟”
+
ظل يحيى صامتًا لوهلة، وكأنه يعيد ترتيب أفكاره، قبل أن يقول بصوت منخفض”أنا مش زعلان عشانها….أنا زعلان عليها، زعلان إنها عيطت بسببي، زعلان إني معرفتش أكونلها الأمير إللي بتتمناه، بس يمكن زعلان على نفسي أكتر، على إني مشيت مع التيار طول عمري، ولما قررت أمشي في طريق مختلف، بقيت فجأة الغلطان، محدش بيديني فرصة حتى أشرح نفسي، وكأنهم شايفين إني عملت جريمة، الابن إللي مش بيغلطوفي حياته غلط، وكنا مستنينه يغلط.”
+
وأحمد أمال رأسه قليلًا قبل أن يرد”بس أنت فعلًا خسرت تيا، حتى لو مش حاسس بده دلوقتي، البنت بتحبك بقالها سنين، وكانت مستنياك، وفجأة لقيت نفسها مرفوضة، حتى لو أنت مش قصدك تجرحها.”