+
انهارت دموعها تخبرها بصوتٍ متهدج وهي ضع يدها على قلبها”قرفانة من نفسي أوي، مش بقدر أبص في المرآية، بقالي داخلة على تلت شهور ومش قادرة أرفع عيوني من الأرض، مكسورة وعيني مكسورة، الكل بيتكلم عليا، الكل بينهش في سيرتي وسمعتي!”
+
وتربيتة بسيطة على يدها تليها جملتها”لاء يانور، البنت إللي شيفاها مش مكسورة، دي بنت قوية بتعافر! وهتتعافى.”
+
“مكسوفة من عمر أوي، متجوزني يستر عليا بعد كلام الكل، عيني بتبقا في الأرض عشان مستحقش أرفعهم فيه وهو كاسرهم.”
+
كانت تخبرها وشهقاتها تتعالى، وهي أجابتها بحنانٍ_:
“إزاي كاسر عينك؟ الشخص إللي برا وجابك ودفع حق الكشف ومستنيكي وخايف عليكي لا يمكن يكون إنسان كاسر عينك، إنتِ مش مذنبة، واوعي يانور تحطي في عقلك فكرة إن الخطيئة جت منك، أنا معرفش تفاصيل الحادثة بس عارفة إن المجتمع هو إللي ظالم، وإنتِ هنا مظلومة وجاية تاخدي حقك، وحقك يعني إنك ترتاحي”.
+
وضعت أناملها الرقيقة على عيونها تخفيهم، وصوتها يخرج متقطع”صعبان عليا نفسي أوي! صعبان عليا كرهي لنفسي وحقدي عليها، بتمنى أموت عشان أبعد عن كل إللي في دماغي.”
+
“والموت عمره ما كان حل ولا خلاص، ودورك جه، نفسك مش محتاجة تتكره يانور، نفسك محتاجة أمان وحب، والحب يكون منك لنفسك، دعمك لنفسك، إنتِ إللي هتقوي نفسك.”