+
ساد الصمت لعدة لحظات حتى تحدثت بنصف بسمة وهي تحرك منكبيها”مش حاجة.”
+
_مش متعلمة!
سألتها روح بنظرات مستغربة لكنها نفت برأسها وهي تتحدث بنبرة بسيطة”لاء، خريجة حقوق.”
+
_طب ومالك زعلانة ليه؟ دي كلية تحفة، دا عبدالرحمن محامي وابني أحمد في حقوق.
+
هزت رأسها بنفي وهي تخبرها بحزنٍ”لاء مش بحبها، أنا كنت عايزة أدخل طب.”
+
ضحكت روح وهي تحدثها بنبرة مرحة”يلاهوي على عقدة كلية القمة! أحمد بردو كان هيتجنن كدا ويدخل طب، وماشي دلوقتي يقول لبابا أنت استبخلت فيا خمسين ألف كلية!”
+
_بابا مستحيل كان يستبخل فيا حاجة، كنت داخلة مدرسة انترناشونال، وكنت هدخل جامعة بردو انترناشونال، بس هو مات وأنا مدخلتش امتحانات تالتة ثانوي فسقطت ونقلت حكومي، ونفسيتي مكنتش كويسة.
+
“طب إنتِ كدا بتعرفي تتكلمي إنجليزي كويس صح؟ لو صح أنا بشتغل في شركة أون لاين مترجمة إنجليزي وقبضها كويس أوي، تشتغلي؟ دي تحفة ومن البيت حرفيًا.”
قالتها روح بتحمس وهي تعرض عليها الفكرة بمنتهى الود، وهي تحدثت باضطراب”مش عارفة حاسة إني بقيت فاشلة أوي فيه، عشان أنا ولا بقيت فاكرة منه حاجة ونص الكلمات طارت وكمان مبقتش أسمع أي حاجة أجنبي.”