آيات بدأت دموعها تنزل بغزارة هرمونية :
_خلاص يا جواد بكرة الواد يطلع في وشه وحمه وتقول أمه السبب
أنت مبقتش تحبني ولا شاري دلالي زي الأول أنا هقوم أنام في أوضة العيال
جواد سحبها لحضنه بقوة وهو بيضحك بقلة حيلة:
_يا بوي على النكد اللي زي السكر عليّ الطلاق ما هنام إلا لما الرنجة تكون قدامك بس بشرط بعد الأكلة دي مفيش بوس لغاية ما ريحة البصل تروح
آيات ضحكت بدلع وغمزت له:
_أنت تقدر يا سيادة المستشار
جواد عض على شفته وقال وهو بيقوم يلبس شاله:
_لا والله ما أقدر ده أنا أتخنق بريحة البصل ولا أبعد عن جمالك يا ملبن انت
وبعد أسبوع كانت نوبة البكاء المفاجئ هي سيدة الموقف جواد دخل الجناح لقى آيات قاعدة في ركن الأوضة وبتعيط بحرقة وهي ماسكة قميص من قمصانه
جواد جرى عليها بخوف:
_مالك يا بت حد زعلك حد من الشغالين غلط فيكي أنطقي وهقطّع خبره
آيات رفعت عينيها الحمراء وقالت بشهقة:
_أنا بقيت وحشة يا جواد بقيت شبه الدبة وشي بقى منفوخ ومبقتش ألبس الكاشات اللي كنت بتحبها أنت أكيد دلوقت بتبص للبنات اللي في النادي وبتقول يا ريتني ما اتجوزت الصعيدية أم خمس عيال دي
جواد جثا على ركبتيه قدامها ومسك إيديها باسهم بحرارة وبعدين شالها وحطها على السرير وقعد يوزع بوسات على كل حتة في وشها:
_يا بوي على العقل اللي طار ده أنتي وانتي منفوخة كدة حتة قشطة بلدي زيادة ده أنتي بقيتي ملبنة أكتر وأكتر وبياضك ده بقى يجهر عيني عليّ الطلاق يا آيات لو شفت ستات الدنيا كلهم في كفة وأنتي في كفة ميزان قلبي يطير ليكي أنتي ….أنتي شايلة ابني شايلة حتة من جواد ده أنا بعد الأيام عشان أشوف النسخة الصغيرة منك