كانت عايزة تموتنى وانا كنت لسانى حتة لحمة حمرا ، بس لحجتنى هانم وچوزها وخدونى عنديهم فى الچبل وحصل اللى حوصل .
بس مش كانت موتتنى احسن ما كنت اشوف العذاب اللى شوفته ده فى دنيتى وانا مليش ذنب .
اه يا حبة جلبى يا وردة
وحشتينى جوى جوى
وردة ، وردة ، وردة
أستيقظ همام على صوت وهدان فحرك رأسه فى آسى حزينا على صديقه وهدان فهتف قائلا………مفيش فايدة فيك يا صاحبى ،كل ليلة بردك ، هتحلم وهتخطُرف بإسم مرتك وردة.
مش عارف كيف راجل يحب وحدة ست الحب ده كله ؟
امال انا ولا بتيجى فى دماغى خالص البهيمة اللى اتجوزتها ليه ؟
بالعكس انا حاسس إن السجن ده اهون من عشرتها اللى تغم النفس دى .
يا وعدى عليكم .
ياما نفسى أخرج اشوفلى وردة حلوة انا كومان ، واهيص واعيش حياتى اللى راحت بين بوز النكد اللى چوزتها والسجن .
أستيقظ أيضا على صوت وهدان سجين آخر يدعى سيد الشحات يشتهر بسوء الخلق ، فصاح قائلا مصوبا نظره نحو همام ………خلى صاحبك يتكتم ويجتصر الشر أحسنله .
بدل ما اجوم أكتمه انا بيدى ، عشان نخلص من تخاريفه دى كل ليلة .
تملك همام الخوف من نظرات سيد المنذرة بعواقب وخيمة .
فمال على جسد وهدان ونغزه بيده ليستفيق قائلا….جوم يا وهدان جوم ، وبطل تخاريفك دى .