جنات بحتت في نصراء وهي مخطمة : إن شالله 
مشت جنات لعند المطبخ ..طلعت طاستين من الدولاب ..وهي في عقلها ..شن صارلي عليش معصبة ..وكان في شي بينهم ..أنا شن دخلني …ينفلقوا
طلعت جنات وجت تبي اتقمعز في مكانها لاقت نصراء مقمعزة ..جنب سفيان ..ومقرب منه اتهدرز وتضحك 
…والكرسي الفاضي كان جنب منى ..وأم نصراء .بعيد يعني 
جنات حطت الطاسة على الطاولة قدام نصراء …ودمها يغلي …وصالحة اتبحت في جنات ..وحست بيها عصبت ..لكن ماتبيش اتكلم قدام الضيوف
صالحة : تعالي قمعزي هنا 
جنات في للحظة قررت أنها معاش تبي اتقمعز …لانها عصبت بكل : لا ماعنديش نية ..تعرفي ..أفطور صحة
صالحة : معقولة ..تعالي كلي حتى اشويا
جنات برمت وتبي ترقى : لا والله أنحس في معدتي ناضت عليا ماعنديش نية ..أفطروا أنتم
سفيان بصوت جدي وحازم : جنة …تعالي قمعزي وأفطري 
جنات فاهمة نبرة صوته ..بس أنتن عارفات جنات ..أكيد تبي ادير اللي في رأسها 
جنات رقت مع الدروج : ماعنديش نية ..مش بلغصب
ومشت لدارها ..خشت واخبطت الباب ..كانت معصبة من وقاحة نصراء ..شن تبي من سفيان راجل متزوج ..والا حتى هيا عارفة بالقصة اللي بينهم ..وتفكيرها هذا زاد عصبها
جنات قمعزت على سريرها وباب الدار انفتح ..وخش سفيان 