جنات : باهي اللي قتلي …وأنت خلك جنبه ورد بالك منه 
فخري : شيباني خويا ..من غير ماتوصي
جنات : شكرأ فخري بجد …شكرا
فخري : العفو …خلي الموضوع سر بينا ..تمام 
جنات ابتسمت : تمام 
فخري : اوكي نمشي قبل يفقدني
نزل فخري …وجنات خشت وقعدت اتفكر في حالة سفيان وقررت ..اتحمله واتحمل عصبيته لعند ايدير العملية
بعد ثلاث ايام مازال يوم وسفيان يدخل للمستشفى …كان طالع مع فخري …وجنات ابروحها في الفندق بعد العشاء …دارت حمام جنابة …والبست بيجاما ..ومقمعزة على المراية اتحط في كريم على وجهها وايديها …مع جيت سفيان خش وصكر الباب …وعلى طول شم بنة عطرها مخلطة بريحة الشامبو 
خش متوتر ..: سلام
جنات : اهلين
سفيان حول جاكته وعزقه على الكنبة …خش الحمام ادوش وطلع ..في سروال بيجاما أسود بس
قمعز على الكنبة ..وجنات اعيونها عليه …واتقول الحمدالله انه مايشوفش فيها كيف اتبحت فيه ..خلاص مش قادرة اتحبه 
جنات ابرمت وصبت : سفيان نبي نحكي امعاك
سفيان عض على فمه وهز راسه يسال فيها بعيونه : شنو
جنات تنهدت : سفيان ننن نبي نحكيلك كل شي صار 
سفيان رفع حاجبه : شن قصدك
جنات ترجف : كل شي صار سفيان من اول ماعرفت منى وتوفيق
سفيان حط رجل على رجل : أحكي نسمع فيك 