ثاني يوم الصبح ناضوا فطروا …وجنات كان خاطرها اتشوف جلال لكن مازال محبوس 
بعد الفطور جنات رنت على مودة عشان اتجي اتسلم قبل تمشي …وبعدها طلع سفيان وفخري وركبوا السيارة ومودة قرصت جنات
جنات : اااه ياباردة
مودة : تستاهلي ياحنة …من وين حصلتي هالكيكة 
جنات بحتت في سفيان راكب في السيارة وابتسمت : هوا اللي حصلني
مودة : اااها عليك ثقة …عشان اعمى مثلا…وحق ربي ايهبل …انحصل واحد كيفه مش مشكلة عادي 
جنات ضربتها على كتفها وضمتها تضحك ..وفخري يستعجل فيها بكلاكس السيارة ..واطلعت ركبت
********************************
وصلوا الفندق في تونس …وكان فخري حاجز دار وحدة لسفيان وجنات 
رقت جنات للدار وسفيان قرب من فخري : ليش دار وحدة مش قتلك احجز دارين جنب بعض
فخري : مافيش ..وقت صيف وزحمة ..القيت دار وحدة 
سفيان : كنت شفت فندق اخر 
فخري : وليش الفندق قريب من المستشفى..الدار خليها لجنات ونحن نمشوا انشوف شقة مع شباب من ليبيا قريب من هنا
سفيان بعصبية : تبيني انسيبها ابروحها هنا 
فخري : خلاص خليك امعاها وانا نمشي مع الشباب
سفيان : هذا الي يبي ايصير اصلا
فخري : تمام
وهذا اللي كان يبيه فخري اصلا
اول يوم عدا ..وفي الليل سفيان رقد على الكنبة وجنات في السرير حكت مع مودة وطمنتها لعند كمل الرصيد وهي تحكي …ومن التعب رقدوا على طول بعدها