جنات قمعزت افطرت بسرعة ..وسلمت على صالحة وملاك واطلعت اركبت امعاهم في السيارة
ركبوا وطلعوا ومافيش اي احداث طول الطريق …بس جنات كانت اتفكر وين يبوا يقعدوا لعند بكرا ….والجواب كان لما سيارة فخري طلعت من لابرق متجهة لمدينة درنة …وجنات اعيونها طلعوا ..تبي تسأل وخايفة من الجواب …لكن نظرة فخري في مراية السيارة طمنتها ان اللي قاعدة اتفكر فيه صاح 
خشوا لدرنة بعد الغداء بواجد …وفخري مشى بيهم لعند حوش اجديدتها و وقف ..جنات على طول انزلت طايرة حتى ماراجت سفيان ايقول شي …وفخري قاعد يضحك 
…اما سفيان كان ميت في حركاتها …وروح الطفلة اللي ساكنتها 
نزلت جنات وطقت على الباب افتحت سليمة وجنات ضمتها وقعدت تبكي 
امرايفة عليها
وبعدها نزل سفيان وفخري وخشوا للمربوعة بعد ماسلموا عليها …واول مرة جنات اتحس انها متزوجة وجاية لاهلها زيارة حتى وأن كان زواج مزيف
بدون تفاصيل جنات كلمت مودة وكانن مرايفات على بعضهن هدرزن واجد وبكن وضحكن ..جميع المشاعر …وأخيرأ جنات حكت لمودة عليش امسافرين لتونس ومودة انصدمت ماكنتش عارفة أن سفيان اعمى …بس جنات حاولت اتلم الموضوع من غير ماتشرح لمودة شن صار بالضبط
عدا اليوم وجنات امقمعزة وسط سليمة ومودة قبل ماتعدي للحوشهم في الليل …تعشوا بعدها وطاحوا رقدوا من التعب بدري