صالحة : نصراء أخت معتز …اليوم هبة عازمة عربها ..وأنا كنت انسلم عليهم وعزمتهم على الفطور
جنات تمتم : كنتي خليتهم يسمسموا عندها 
صالحة اتنظم في السفرة : شن قلتي ؟!!
جنات : مرحبا بيهم 
ديما صاحبة واجب…….وتبي اتموت اعيونها على المطبخ 
صالحة : سلمتي
مع خشت ملاك : صباح الخير
جنات : اهلين
صالحة : ملاك ..جنات صبوا ساعدوني ..قبل ايجوا .هيا بسرعة
جنات صبت بلا نية : اوووفه 
خشن للمطبخ بس سفيان ونصراء مش قاعدين ..شكلهم طالعين من باب المطبخ للجنان …وجنات كانت اتجهز امعاهن وعقلها عند سفيان …زعما وين وشن ايدير ..قاعدة مع نصراء ..باهي شن بينهم …البنت كان واضح واخذا وضعها مع سفيان على لاخر 
جنات اتنظم في السفرة وخش فخري : صباح الخير
جنات صباح النور
فخري مستعجل خذا خبزة وفتحها وبدأ ايدير في ساندويتش
جنات اتبحت فيه : قمعز أفطر أمعانا
فخري كمل وحط زيتون في فمه : لا مستعجل ..نبي نطلع ورايا شغل واجد …وطلع
حطن باقي الفطور ..وخشت منى وهبة وأمعاهن مراة كبيرة اشويا ..وعيل ممكن في الاعدادي ..
هبة اتبحت في جنات : هذي مرات سفيان ..جنات
المراة سلمت عليها : اهلين كيف حالك ..مبروك ..جيت حضرت الفرح ..بس أكيد متذكرينيش
جنات : الله ايبارك فيك …لا بصراحة كان زحمة ..مش مركزة