صالحة : تبي اطول غادي
سفيان : مش عارف على حسب الجو …بس نبي انوصيك على سليم ..ردي بالك منه وخليك ديما جنبه
صالحة : تمشي واتجي طيب …وسليم في اعيوني ماتشيلش همه بكل 
سفيان : عارف وأنا مستحيل كنت انسيبه ابروحه لو مش متأكد منك تهتمي بيه
صالحة ابتسمت : مهما اندير مانقدرش انرد شي من جمايلك أنت وعمي أمعانا
سفيان سكت ورد يأكل ..وجنات معاش عندها نية تأكل ولما بحتت في منى لاقتها اتبحت فيها بنظرة اتخوف
..خافت وصبت : الحمدالله 
صالحة : قمعزي وكملي …ماكليتي شي
جنات : لا خلاص شبعت الحمدالله ..سفرة دائمة ورقت بسرعة
خشت لدارها وهي ترجف ..هل كانت ترجف من الخوف من منى بس ..والا كان في سبب ثاني …أكيد مش بس هك …جنات مش قادرة اتخيل الحوش من غير سفيان تعودت عليه وعلى عصبيته وكلامه ..حتى على حنيته اللي مغلفة بقسوة مزيفة 
طولت وهي تفكر ومتحملة …وبعدها معاش قدرت قعدت تبكي 
وهي مش فاهمة ليش تبكي
************************
جلال مال من الحبس وقاعد ايدخن ..ورنت عليه مودة وقرر ايرد عليها
مودة : الو جلال وأخيرأً رديت عليا 
جلال جبد من السبسي : نعم شن تبي 
مودة : نبي نطمن عليك …جلال ليش درت هكي
جلال : تسألي فيا ليش درت هكي …تي باهي ما قتلته ولد الكلب ..وربي مازلت وراءه 