سفيان امسكه من دبشه : وأنت طبعا ذيل الصبايا …حتى هلك مايعرفوا وين مشيتوا …سألناهم وقالوا مانعرفوش
معتز ايفك في ايدين سفيان وخايف : وسع بالك شيباني ..حتى هلي والله ماكان عندهم علم بمشيتي لدرنة الا بعد شهر لما استقريت كلمتهم
سفيان دفه : تعرف نكره أم الراجل اللي ماعنداش شخصية ويتبع في كلام عيت حنة وخلاص …هذا عليش مانيش لايم عليك
معتز ايحك في وجه منحرج : ماتبي مني شي اخرى 
سفيان ضحك بهزوا : شن نبي منك 
…اصلا واضح محفظاتك الدرس اكويس وأنت ماتعرف رأسك من رجليك …لكن وديني ومانعبد يامعتز ..اتعاودها مرة اخرى وتمشي في جرت عيت حنة …المزرعة هذه معاش تحلم اتخشها اخرى
معتز زمط وطلع بسرعة : إن شالله ..اوكي عندي ضيوف
طلع ورد خايف : سس سفيان بيش اتجي للعشاء
سفيان تنهد بعصبية ومعتز طلع يجري 
وصلن للحوش خشن الحوش معبى هل معتز واعمام سفيان اللي يسكنوا امعاهم ..سلمنا وقمعزن …وطبعا نفس العادة الانظار كانن على جنات لانها مازلت عروس جديدة عليهم ..وهذه اول مرة ايشوفوها بعد عشاء الحفلة اللي بعد الفرح
كان عشاء عادي …لكن جنات تضايقت من نظرات منى لها ..كل ما اتخش او تطلع …بعد العشاء جنات صبت تبي الحمام تغسل ..افتحت باب تحسابه الحمام ..لاقاتها دار …بس لافت نظرها غطاء السرير والدبش …وتذكرت دار توفيق في الحوش اللي في درنة ..وعرفت أن هذه دار توفيق هنا