جنات طبست رأسها اتصكر فيها ..وسفيان تكلم : أنا نازل ..لما تمشوا قولولي
جنات ساكتة وملاك ردت : حاضر 
طلع سفيان وجنات لابست عباتها ونزلت مع ملاك لوطى ..لاقن صالحة تستنى فيهن …عدن مع بعضهن للحوش هبة ومنى في اخر المزرعة
سفيان بعد نزل ..جاءه معتز
سفيان : قمعز
معتز قمعز وهو متوتر : قالولي دزيت عليا
سفيان قمعز : من أمس قتلك نبيك 
معتز : اها أمس طولت ماجيت ولما سالت عليك قالوا طلع 
سفيان يبرم في ساعته في يده : هات أحكيلي …شن درتوا في السنة اللي غبتوا فيها برا بنغازي
معتز زمط : شن نحكي …عادي زي ماتعرف من منى وهبة
سفيان صبا معصب وزق الكرسي اللي كان مقمعز عليه : مانعرفش شي …شوف أنا ليا كم شهر ساكتلك ..لاني مش فاضي كنت مركز في توفيق ومرضه ومشاكله …لكن خاطري نعرف كيف طلعتوا من بنغازي وعليش 
معتز صبا خايف : مافي شي …نفس ماقالتلك منى …توفيق صكر راسه يبي ايعدي لدرنة ..ومنى حاولت تمنعه لكن هوا شي عناد
سفيان : وأنت شنو مانكش راجل ..تجري في جرت صبايا وخلاص ..ليش ماجيت وحكيت امعايا 
معتز : سفيان الجو كان متوتر مع بنات عمك …ونحن طلعنا من المزرعة بعد عركتك مع منى ..ولما جينا نبوا نمشوا للدرنة …منى قالت مانبيش حد يعلم