معتز طالع عشان يبي االسوق وطلعت وراءه هبة
هبة : معتز راك تنسى تمشي لسفيان بعد اتروح ايسد أمس توا ايشك فينا
معتز : تمام ..إن شالله خير
هبة : خليك على نفس الكلام الي اتقفنا عليه بس ..وإن شالله مافيش خوف
معتز تنهد وركب سيارته وطلع من المزرعة
**************************
مودة كلمت جلال كم مرة لكن هوا معصب ومايبيش ايرد عليها 
مشت رنت على جنات وحكت امعاها واطمنت على جلال ..وجنات قالتلها اطمني جلال مستحيل ايسببلك في مشكلة مع هلك 
قبل المغرب جنات كانت مدوشة وتمشط في شعرها امقمعزة في دارها وكانت منسجمة لان منى اليوم بعد الصبح معاش شافتها لاهية عند هل معتز 
خشت عليها صالحة : خييير
جنات : اهلين 
صالحة : مازلتي مالابستي
جنات : ليش ..عشان شنو 
صالحة قمعزت جنبها على السرير : مش قتلك بدري معزومين عند هبة ..عندها عشاء
جنات قلبت اعيونها وتلف في شعرها : ساد اليوم عيت نصراء فطور وغداء ..عشاء اخرى واجد راه 
صالحة ضحكت 
: هيا عيب هبة عزمتنا ومايجيش نمشوا وانخلوك ابروحك…يابال صبايا اعمامي معزومات توا يسألوا عليك
جنات تنهدت : حاضر عشان خاطرك بس
صالحة صبت : يجبر بخاطرك …البسي وحطي مكياج حلو ..راكي مرات سفيان الشيباني ومازلتي عروس