******************************
بعد صلت الظهر جنات نزلت لوطى لكن سفيان مش قاعد ..واستغربت من نصراء وأمها مازالن قاعدت …ايهدرزن في الصالة 
…وجنات مشت وخشت على صالحة في المطبخ اطيب في غداء وحايسة
جنات : انساعدك في حاجة
صالحة : ياريت والله …على الاقل خير من ملاك اللي ملتهية مع نصراء وتهدرز 
جنات ضحكت وبدأت تساعد فيها 
صالحة طبعا حاولت اتغير على جنات بعد الكلام اللي سمعته من منى ..لكن مش عارفة ليش مش قادرة ..ممكن لانها حاسة بيها بنت طيبة 
جنات : ليش مكثرة ..اتقول عازمة حد
صالحة : اها مسكتهم عشان ايتغدوا عندنا …وهبة تبي ادير عشاء بعدين في حوشهم
جنات : صاحبة واجب بكل حسيتك …ماشور شي …ايسد الفطور
صالحة اتقطع في الخضرة ..وابتسمت كانت حاسة بغيرة جنات على سفيان من نصراء 
طاب الغداء …وكان الفطور بس على الطاولة ..وقت الغداء ..كل حد تغداء في مكان …الرجالة ابروحهم …والصبايا في مكان ثاني …بعد الغداء هل معتز عدوا مع هبة ومنى للحوشهم …وملاك وجنات ايحوسن مع صالحة في الحوش
سفيان بعد الغداء حكى مع فخري وهوا قاله نهيت الامور . والجوازت يومين ويكونن جاهزات ..وفخري طلع وعدا …وسفيان كان برا خش للحوش يسمع في جنات اتهدرز وتضحك مع ملاك وصالحة في المطبخ …ابتسم ورقى فوق ..مشى شاف سليم ..وبعدها خش ايريح في داره شويا