جنات : يعني مش عشان عركتك مع عيسى
جلال : لا …صاحب المحل يبي تعويض 
جنات : ومن وين تبي اتجيب فلوس 
جلال : ماعنديش له فلوس ..لكن خالك أكيد توا يطلع ولده
جنات : وأنت ؟!!
جلال : ماتخافيش عليا ربي كريم
جنات : نجك ليا ..والله عقلي عندكم وامرايفة عليكم ..ياريتني نقدر انشوفك 
جلال : جنات بالله ماتزيديها عليا …أسكتي الله ايربحك ..مش اول مرة ننحبس
جنات تمسح في ادموعها : باهي خلي بالك من روحك ..وأنا توا انعاود نتصل بيك بعدين
جلال : تمام
جنات : جلال …رد على مودة كان اتصلت بيك ..راهي خايفة عليك
جلال : فكيني من سريبها معصب منها ..وكان انشوفها أنتش شعرها هالفرخة 
جنات ابتسمت وسط ادموعها …وهي اتفكر هابا يا جلال لو تعلم حتى أنا عيسى شن كان امعايا قبل ما نتزوج
جنات : هدي أعصابك سلم خيي ..وماتنساش أن مودة خوافة اتخاف من زولها ..ماتلومش عليها
جلال : ايصير خير ..ماتبي شي ..خايف يكبسوني انكلم فيك ..التليفون امعايا بالسرقة
جنات : لا خلاص اوكي …رد بالك من روحك ..وطمني عليك بس
جلال تنهد : إن شالله
صكرت جنات وصبت غسلت وجهها وتوضت للظهر ..وعدت شافت توفيق لاقاته امكمل فطوره …عطاته دواءه …وكان هادي نفس عادته في اخر فترة …وجنات حست أنه طيب غير المرض مأثر فيه 